َّاسلا م آباد(صباح نیوز)وزیر مملکت اطلاعات و نشریات فرخ حبیب نے کہا ہے کہ وزیراعظم عمران خان نے پیٹرول و ڈیزل اور بجلی کی قیمتوں میں کمی سمیت ایک بڑے عوامی ریلیف پیکیج کا اعلان کیا ہے اور آئندہ بھی عوام کو ریلیف دیتے رہیں گے،قیمتیں کم کرنے پر بھی اپوزیشن کو اعتراض ہے۔
وفاقی وزیر اقتصادی امور خسرو بختیار کے ہمراہ پریس کانفرنس سے خطاب کرتے ہوئے انہوں نے کہا کہ وزیراعظم عمران خان نے عوامی ریلیف پیکیج کا اعلان کیا ہے، پٹرول اور ڈیزل کی قیمت میں 10,10روپے اور بجلی فی یونٹ 5 روپے کم کیے ہیں، عالمی سطح پر مہنگائی ہوئی تو امریکا،یورپ، برطانیہ سمیت پوری دنیا میں مہنگائی کا 40سالہ ریکارڑ ٹوٹ گیا۔وزیر مملکت نے کہا کہ پٹرول فی بیرل 40 ڈالر سے 111ڈالر، خوردنی تیل 400 ڈالر سے 1300 ڈالر فی ٹن، کوئلہ 40 ڈالر سے 200 ڈالر پر پہنچ چکا ہے، دنیا میں ہونے والی مہنگائی کا اثر حکومتوں اور عوام پر پڑا،امریکا میں مہنگائی کا 42 سالہ ریکارڈ ٹوٹا ہے، ہمارا خیال تھا کووڈ 19 کے بعد حالات بہتر اور مہنگائی کی شرح کم ہوگی تو عوام کو ریلیف دیں گے۔
ان کا کہنا تھا کہ دنیا میں لاجسٹک اور رانسپورٹیشن مہنگی ہوئی ہے، اسکے بھی اثرات ہیں، اسی صورت حال میں عمران خان نے عوام کو بوجھ ڈالنے کی بجائے ریلیف دیا، پیٹرولیم مصنوعات کی قیمتوں میں حالیہ کمی سے پہلے بھی ٹیکسز کم کرنے سے حکومت 70ارب کا بوجھ خود برداشت کررہی تھی، ٹیکس وصولیاں بھی ریکارڈ ہیں، 8 ماہ میں 30فیصد ٹیکس زائد اکٹھے کیے ہیں، پہلے اپوزیشن آئی ایم ایف کے پاس جانے پر تنقید کررہی تھی اور اب قیمتیں کم کرنے پر بھی اپوزیشن کو اعتراض ہے، اپوزیشن منافقانہ رویہ ترک کرے۔ان کا کہنا تھا کہ اپوزیشن منافقانہ رویہ ترک کرے عمران خان نے معیشت کو دیوالیہ سے ٹیک آف پر پہنچا دیا، ہمارے وزیراعظم کے محلات نہیں، منی لانڈرنگ نہیں کی اور نہ ہی لوٹ مار کی، ، اپوزیشن جان چکی ہے کہ پی ٹی آئی حکومت کہیں جانے والی نہیں،یہ پانچ سال مکمل کرے گی اور آئندہ حکومت بھی پی ٹی آئی کی ہی ہوگی،
صنعتوں اور پیداوار کے وزیر مخدوم خسرو بختیار نے کہا ہے کہ حکومت کی دانشمندانہ پالیسیوں کی بدولت معاشی ترقی مثبت سمت میں گامزن ہے۔بدھ کی شام اسلام آباد میں اطلاعات و نشریات کے وزیر مملکت فرخ حبیب کے ہمراہ صحافیوں سے باتیں کرتے ہوئے انہوں نے کہا کہ برآمدات اور ترسیلات بیالیس ارب ڈالر سے بڑھ کر چونسٹھ ارب ڈالر ہوگئی ہیں۔انہوں نے کہا کہ حکومت آئندہ سال کے لئے چھتیس ارب ڈالر کا برآمدات کا ہدف پورا کرنے کے لئے سخت محنت کررہی ہے۔
خسرو بختیار نے کہا کہ وزیراعظم کی جانب سے اعلان کردہ صنعتوں کے فروغ اور سرمایہ کاری پیکیج کا مقصد غیر دستاویزی معیشت کو دستاویزی بنانا سرمائے کو تعمیری شعبے کی طرف منتقل کرنااور بیرون ملک مقیم پاکستانیوں کو صنعتی شعبوں میں سرمایہ کاری کرنے پر مراعات دینا اور پاکستان کے صنعتی شعبے کی بنیاد کو توسیع دینا ہے۔
