مکہ مکرمہ (صباح نیوز)مکہ مکرمہ میں رمضان المبارک کے دوران عمرہ زائرین کی نگرانی کے لیے 200 سمارٹ سکرینیں نصب کر دی گئیں۔سعودی حکام نے رمضان المبارک کے دوران عمرہ کے لئے زائرین کی بڑھتی ہوئی تعداد کے پیش نظر سکیورٹی انتظامات کو مزید سخت کر دیا ہے۔ اس سلسلے میں مکہ مکرمہ کے مرکزی کنٹرول سینٹر میں 200 سے زائد اسمارٹ سکرینیں نصب کی گئی ہیں جو شہر میں جاری آپریشنز کی براہِ راست نگرانی اور انتظام میں مدد فراہم کریں گی۔
یہ جدید ترین مرکز حرمِ اور دیگر اہم مقامات پر سکیورٹی منصوبوں کے نفاذ اور ہم آہنگی میں کلیدی کردار ادا کر رہا ہے، یہ نظام زائرین کی آمد، نقل و حرکت اور روانگی کو یقینی بنانے کے لئے ترتیب دیا گیا تاکہ ہجوم کے بہا کو محفوظ رکھا جا سکے اور کسی بھی ہنگامی صورتحال کا فوری جواب دیا جا سکے۔کنٹرول سینٹر مکہ مکرمہ میں 11 اہم داخلی راستوں کے علاوہ 8 سے زائد داخلی سکیورٹی چیک پوائنٹس کی نگرانی کرتا ہے۔ سکیورٹی کے مختلف امور کو 7 مخصوص شعبوں میں تقسیم کیا گیا جس کی بدولت پورے شہر میں سکیورٹی انتظامات کو مربوط انداز میں چلایا جا سکتا ہے اور تمام ترقیاتی مراحل کو براہ راست مانیٹر کیا جا سکتا ہے۔یہ جدید مرکز 24 گھنٹے فعال رہتا ہے اور رمضان المبارک کے دوران سکیورٹی انفراسٹرکچر کا ایک اہم حصہ ہے۔ اس کے ذریعے حکام زائرین کے بہا ئوکو ٹریک کر سکتے ہیں، ہجوم کی گنجائش کو مانیٹر کر سکتے ہیں اور کسی بھی ممکنہ واقعہ پر فوری ردعمل دے سکتے ہیں۔
