کراچی (صباح نیوز)کراچی میں مختلف ٹریفک حادثات میں ماں اور بیٹے سمیت 4 افراد جاں بحق ہوگئے جبکہ شاہراہ فیصل پر ڈمپر الٹنے سے ٹریفک کی روانی بھی شدید متاثر رہی۔کراچی میں ہیوی ٹریفک کی صورت موت کے سائے منڈلانے لگے، صبح سویرے مین شاہراہ فیصل ڈرگ روڈ یو ٹرن کے پاس تیز رفتار دندناتا ہوا ڈمپر الٹ گیا، جس کے باعث ملینیم مال، ڈرگ روڈ اور شاہراہ فیصل پر شدید ٹریفک جام ہوگیا،
حادثے کے نتیجے میں کوئی جانی نقصان نہیں ہوا۔ادھر قیوم آباد جام صادق پل پر ایک اور ٹریفک حادثہ پیش آیا، جہاں تیز رفتار ٹرالر کی ٹکر سے موٹرسائیکل سوار 18 سالہ راج ولد عاشق موقع پر جاں بحق اور 15 سالہ لیون ولد فلک شیر زخمی ہوگیا۔ ہلاک اور زخمی افراد کو جناح ہسپتا ل منتقل کردیا گیا۔دوسری جانب شیر شاہ روڈ میزان بینک کے قریب ایک اور ٹرالر نے ماں اور بیٹا جان لے لی، جاں بحق خاتون کی شناخت 25 سالہ شبانہ جبکہ بچے کی لاش کی شناخت زوہان کے نام سے ہوئی۔کراچی میں ٹریفک حادثات کی سب سے بڑی وجہ ہیوی ٹریفک کیلئے قانون پرعملدرآمد نہ ہونا ہے
۔ماں اور بیٹے کی لاشیں ضابطے کی کارروائی کے لیے سول ہسپتا ل منتقل کردی گئیں، حادثہ ٹرالرکی ٹکر سے پیش آیا، متوفیہ خاتون بچے اور شوہر کے ہمراہ موٹرسائیکل پر سوار تھیں۔پولیس کے مطابق حادثے میں متوفیہ خاتون کا شوہربھی زخمی ہوا، حادثے کا ذمہ دار ڈرائیور موقع سے فرار ہوگیا جبکہ پولیس نے ٹرالر کو تحویل میں لے کر تحقیقات شروع کردی۔ادھر گلستان جوہر پرفیوم چوک کے قریب گاڑی کی ٹکر موٹر سائیکل سوار شخص جاں بحق ہوگیا، جس کی فوری شناخت نہیں ہوسکی۔
