اسلام آباد(صباح نیوز)وزیراعظم میاں محمد شہباز شریف وفد کے ہمراہ ریاض میں منعقد ہونے والی اسلامی عرب سربراہی کانفرنس میں شرکت کیلیے سعودی عرب روانہ ہوگئے۔ سعودی عرب کے شہر ریاض میںآج (سوموار) کے روز کانفرنس کا انعقاد کیا جائے گا جس میں عرب اور مسلم ممالک کے سربراہان شرکت کریں گے۔اس کانفرنس میں مشرق وسطی کی صورتحال، خاص طور پر فلسطین میں جاری اسرائیلی جارحیت اور خطے میں امن و استحکام کے امور پر گفتگو کی جائے گی۔کانفرنس کے دوران رہنما اسرائیل کے فلسطینی عوام پر جاری مظالم، جنگی جرائم اور انسانی حقوق کی سنگین خلاف ورزیوں پر تبادلہ خیال کریں گے۔ عالمی برادری سے اسرائیل کو جوابدہ بنانے اور فلسطینیوں کے حقوق کی حفاظت پر زور دیا جائے گا، فلسطینی عوام کے حقوق کے لیے پاکستانی موقف کو اجاگر کریں گے۔اس کانفرنس سے مسلم دنیا کی جانب سے فلسطین کی آزادی و خود مختاری کے لیے حمایت کا مضبوط پیغام دیا جانے کی امید ہے۔
وزیراعظم ہائوس کی جانب سے جاری اعلامیے کے مطابق شہباز شریف اسلامی سربراہی اجلاس میں شرکت اور خطاب کریں گے جبکہ سمٹ کی سائیڈ لائینز پر وزیر اعظم کی عالمی رہنماں سے ملاقاتیں بھی متوقع ہیں۔ وفاقی وزیر برائے اطلاعات و نشریات عطا اللہ تارڑایڈووکیٹ اور وزیراعظم کے معاون خصوصی سید طارق فاطمی بھی وزیراعظم کے ہمراہ ہیں۔ یہ غیر معمولی سربراہی اجلاس سعودی عرب کی حکومت کی جانب سے بلایا گیا ہے، جس میں غزہ اور فلسطین سمیت مشرق وسطی کی صورتحال پر تبادلہ خیال کیا جائے گا۔سربراہی اجلاس میں عرب لیگ اور او آئی سی کے رکن ممالک کے سربراہان مملکت و حکومت شرکت کر رہے ہیں۔
