گوجرخان (صباح نیوز)اسپیکرقومی اسمبلی راجہ پرویز اشرف نے کہا ہے کہ ہم نے ہمیشہ عوامی، پارلیمانی سیاست کی ہے،عوام کو روزگار کی فراہمی مسائل کو ان کی دہلیز پر حل کرنے پر یقین رکھتے ہیں ۔ آئندہ الیکشن میں عوام انشااللہ پیپلز پارٹی کو کامیاب بنائے گی۔
حلقہ انتخاب میں عوامی اجتماع سے خطاب کرتے ہوئے راجہ پرویز اشرف نے کہا کہ پیپلز پارٹی نے جب بھی اقتدار حاصل کیا ہے وہ عوام کی طاقت کے ذریعے حاصل کیا ہے۔ ماضی میں بھی پارٹی کو عوام سے دور رکھنے کی کوششیں کی گئیں لیکن عوام سے دور نہیں کیا جاسکا۔ہماری پارٹی نے اپنے دور حکومت میں عوامی فلاح و بہبود کے لیے متعدد اقدامات اٹھائے ہیں جس کی مثال گوجر خان میں جاری ترقیاتی منصوبوں سے واضح ہے۔پیپلز پارٹی غریب اور متوسط طبقے کی جماعت ہے جس کی وجہ سے اس کی عوام میں جڑیں مضبوط ہو رہی ہیں۔ہمیشہ عوامی جدو جہد کے ذریعے اقتدار حاصل کیا ہے۔ پیپلز پارٹی آئندہ بھی عوامی طاقت کے ذریعے اقتدار حاصل کرے گی۔
گوجر خان میں ترقیاتی اور عوامی فلاح و بہبود کے لیے جاری منصوبوں پر گفتگو کرتے ہوئے انھوں نے کہا کہ گوجر خان کو تعمیر و ترقی اور تعلیم سے آراستہ کرنا میرا نصب العین ہے۔ گوجر خان کی عوام سے کیے گئے وعدوں کو ہر صورت میں پورا کیا جائے گا۔ پیپلز پارٹی کے دور حکومت میں گوجر خان میں فقید المثال ترقیاتی منصوبے لگائے گئے ہیں۔انہوں نے کہا کہ گوجر خان کی عوام کے مسائل کے کو ان کے دہلیز پر حل کرنے میں کوئی کسر اٹھا نہیں رکھیں گے۔
