کراچی (صباح نیوز)پاکستان کرکٹ ٹیم کے سابق کپتان شاہد آفریدی نے کہا ہے کہ قومی کرکٹ ٹیم کی سلیکشن میں صرف زمان خان کی کمی ہے ، قومی ٹیم ایشین وکٹوں پر ورلڈ کپ نہیں جیتے گی تو کہاں جیتے گی۔
سٹی سٹیشن پر فلٹر پلانٹ کے افتتاح کے موقع پر میڈیا سے گفتگو کرتے ہوئے شاہد آفریدی نے کہا کہ بھارت کی وکٹیں بیٹنگ کے لیے سازگار ہوتی ہیں، شاداب خان اور اسامہ میر کی کارکردگی اہم ہو گی۔انہوں نے کہا کہ قومی کرکٹ ٹیم کی سلیکشن میں صرف زمان خان کی کمی ہے، فخر زمان کے پاس پورا ورلڈ کپ ہے اور وہ رنز بنائے گا۔شاہد آفریدی کا کہنا ہے کہ آسٹریلیا کے خلاف وارم اپ میچ میں گرین شرٹس کو کارکردگی دکھانا ہو گی، پہلے وارم اپ میچ میں جن کھلاڑیوں کو آرام کرایا گیا انہیں اب موقع ملنا چاہیے۔ا نہوںنے کہا کہ کراچی میں ہمیشہ سے صاف پانی کا مسئلہ رہا ہے، ہماری فائونڈیشن فلاحی کاموں میں پیش پیش رہتی ہے، چاروں صوبوں میں صاف پانی کے لئے پروجیکٹ پر بہت کام کیا ہے، سٹی سٹیشن کے بعد کینٹ سٹیشن پر بھی فلٹر پلانٹ لگائیں گے۔
