اسلام آباد(صباح نیوز) مری ایکسپریس وے پر بستال موڑ کے قریب بس الٹ گئی، جس سے 28افراد شدید زخمی ہو گئے۔
ریسکیو 1122 حکام کے مطابق مری سے لاہور جانے والی بس میں70 سے زائد مسافر سوار تھے، جس کے الٹنے سے 28 مسافر زخمی ہو گئے، جن میں سے 25 شدید زخمیوں کو طبی امداد کے لئے ہسپتا ل منتقل کردیا گیا ۔مسافر بس ایکسپریس وے پر بستال موڑ کے قریب ڈرائیور سے بے قابو ہوکر الٹی۔ واقعہ کی اطلاع ملتی ہی ریسکیو 1122 کی 5 ایمبولینس گاڑیاں اور ریسکیو ایمرجنسی وہیکلز اور دیگر طبی عملہ پہنچا اور زخمیوں کو ابتدائی طبی امداد فراہم کی۔
ریسکیو ترجمان کے مطابق حادثے کے نتیجے میں 28 افراد زخمی ہوئے جن میں سے 3 معمولی زخمیوں کو موقع پر طبی امداد پہنچا کر فارغ کردیا گیا جب کہ 25 شدید زخمیوں کو قریبی ہسپتا ل منتقل کردیاگیا۔ حادثے کی وجوہات جاننے کے لیے تحقیقات شروع کردی گئیں ۔
