کرا چی (صباح نیوز)کراچی کے علاقے پیر آباد بنارس کے قریب گھر میں فائرنگ سے 3 افراد قتل جبکہ پولیس اہلکار سمیت دو زخمی ہو گئے۔
تفصیلات کے مطابق کراچی کے علاقے پیرآباد میں پولیس نے ملزم کی گرفتاری کیلئے گھر پر چھاپہ مارا تو گھر کے اوپر سے ملزمان نے فائرنگ کردی، فائرنگ کے تبادلے میں 3 افراد جاں بحق جبکہ پولیس اہلکار سمیت 2زخمی ہوئے۔ قتل ہونے والوں کی شناخت شبیر اور یار گل اور عبداللہ کے نام سے ہوئی جبکہ زخمیوں اور عینی شاہدین کے بیانات لئے گئے،
پولیس حکام نے کہا کہ واقعہ مکان کے تنازع پر پیش آیا جب کہ جوہر آباد پولیس کے اہلکار اس معاملے میں کیوں آئے تحقیقات کررہے ہیں۔
دوسری جانب واقعہ میں زخمی افتخار شاہ کے بھائی سلمان شاہ نے میڈیا سے گفتگو میں بتایا کہ ان کا ایک پارٹی سے مکان کا تنازعہ چل رہا ہے، رات گئے ایک درجن سے زائد مسلح افراد نے گھر میں داخل ہونے کی کوشش کی، مسلح افراد کے ہمراہ دو پولیس یونیفارم میں ملبوس افراد بھی تھے اور مسلح افراد اسلحہ کے زور پر مکان خالی کرانا چاہتے تھے جس کے نتیجے میں تصادم کے دوران فائرنگ سے میرا بھائی زخمی ہوا اور باہر سے آنے والے تین افراد ہلاک ہوگئے۔
