کراچی(صباح نیوز) نشان حیدر پانے والے پاک فضائیہ کے پائلٹ راشد منہاس شہید کی والدہ انتقال کر گئیں۔
سماجی رابطے کی ویب سائٹ ٹوئٹر پر ترجمان پاک فضائیہ نے بتایا کہ پاک فضائیہ کے سربراہ ظہیر احمد بابر نے بیگم رشیدہ کی وفات پر اظہار تعزیت کیا۔ترجمان پاک فضائیہ کے مطابق ائیر چیف مارشل نے تعزیتی پیغام میں مرحومہ کے ایصال ثواب کے لیے دعا کی،
ایئرچیف مارشل نے کہا کہ اللہ غمزدہ خاندان کو یہ دکھ صبر و ہمت سے برداشت کرنے کی توفیق عطا فرمائے۔اس سے قبل 2019 میں بیگم رشیدہ منہاس کی طبیعت کے حوالے سے خبر سامنے آئی تھی کہ وہ شدید علیل ہیں اور ہسپتال میں زیر علاج ہیں۔
یاد رہے کہ راشد منہاس نے 1971 کی جنگ میں وطن عزیز کے لیے جان قربان کی تھی۔راشد منہاس کو 21اگست 1971 کو کراچی کے آرمی قبرستان میں سپردخاک کیا گیا تھا۔ راشد منہاس کو ان کی بہادری اور وطن کی خاطر جان کا نذرانہ پیش کرنے پر اعلی ترین فوجی اعزاز نشان حیدر سے نوازا گیا، وہ نشان حیدر کا اعزاز پانیوالے کم عمر ترین پائلٹ ہیں
راشد منہاس شہید کی والدہ فوجی اعزاز کے ساتھ سپرد خاک
نشان حیدر پانے والے پاک فضائیہ کے پائلٹ راشد منہاس شہید کی والدہ انتقال کر گئیں،بیگم رشیدہ منہاس کو فوجی اعزاز کے ساتھ سپرد خاک کر دیا گیا۔ترجمان پاک فضائیہ کے مطابق پاک فضائیہ کے دستے نے مرحومہ کو گارڈ آف آنر پیش کیا،
نماز جنازہ میں اعلی سول اور عسکری حکام بھی شریک ہوئے۔سربراہ پاک فضائیہ کی جانب سے قبر پر پھولوں کی چادر چڑھائی گئی،انہوں نے بیگم رشیدہ کی وفات پر اظہار تعزیت کیا۔ترجمان پاک فضائیہ کے مطابق ائیر چیف مارشل ظہیر احمد بابر نے تعزیتی پیغام میں مرحومہ کے ایصال ثواب کے لیے دعا کی
