راولپنڈی(صباح نیوز) عوامی مسلم لیگ کے سربراہ اورسابق وزیر داخلہ شیخ رشید احمد نے کہا ہے کہ مہنگائی کا طوفان آنیوالا ہے ،حکومت عوامی غیض و غضب سے نہیں بچ سکتی، ایک ووٹ کی اکثریت ، بیساکھیوں کا سہارا اور آئی ایم ایک کی خیرات، کیسے چلے گی یہ حکومت؟اگر عمران خان گھر میں بھی بیٹھ جائے تو یہ 11اتحادی پارٹیاں ایک مہینہ بھی اکٹھے نہیں چل سکتیں۔
ان خیالات کااظہار شیخ رشید احمد نےآج ٹوئٹر پر جاری اپنے بیان میں کیا۔
شیخ رشید احمد نے کہا کہ مہنگائی کا جو طوفان آنے والا ہے اس پر حکومت عوام کے غیض و غضب سے نہیں بچ سکتی۔
انہوں نے کہا کہ ملک وہاں پہنچ گیا جہاں سیاسی پارٹیوں کے چلانے کا بس نہیں ۔ ا نہوں نے کہا کہ یہ نیب، اے این ایف اور ایف آئی اے میں اپنے افسر لگائیں گے، کیس ختم کروائیں گے اور گھر چلے جائیں گے۔
انہوں نے کہا کہ اگلے مہینے جب لوگ نکلیں گے تو وہ کسی کے کہنے پر بھی واپس نہیں جائیں گے کیونکہ ان کے گھر میں صرف بھوک ان کا انتظار کر رہی ہے۔ ایک ووٹ کی اکثریت کی 11اتحادی جماعتیں جتنا بھی زور لگا لیں دنیا کی کوئی طاقت ان کو گھر جانے سے نہیں روک سکتی۔
شیخ رشید نے کہا کہ ان میں تباہ حال معیشت کو بچانے کی کوئی صلاحیت نہیں ہے اور آج بھی یہ مال بنانے، بچانے اور گھر جانے کے لئے آئے ہیں۔
