اسلام آباد(صباح نیوز)پاکستان تحریکِ انصاف کے بانی رکن اکبر ایس بابرنے کہا ہے کہ سابق وزیر اعظم عمران خان دانستہ طور پر عوام کو اداروں سے لڑانا چاہتے ہیں۔
اسلام آباد میں الیکشن کمیشن کے باہر میڈیا سے گفتگو کرتے ہوئے اکبر ایس بابر نے کہا کہ میر جعفر اور میر صادق وہ ہیں جو آئین توڑتے ہیں، عمران خان آپ اپنی آخرت کو کب سنواریں گے؟۔انہوں نے کہا کہ عمران خان، آپ کے دور میں جو ظلم ہوا لوگوں کو کب انصاف ملے گا۔
ا نہوں نے کہا کہ عمران خان کہتے ہیں آزادی مارچ کرنے جارہے ہیں سب سے پہلے پی ٹی آئی کو اپنی بادشاہت سے آزاد کریں، وہ خود آئین اور قانون سے بالاتر سمجھتے ہیں۔
اکبر ایس بابر نے کہا کہ توقع ہے 8 سال بعد فارن فنڈنگ کیس کا فیصلہ سنایا جائیگا، یہ فارن فنڈنگ کیس ملکی سلامتی کا کیس ہے، جو پاکستان کی سالمیت سے جڑا ہے۔پی ٹی آئی کے منحرف رکن نے کہا کہ عمران خان کا فوری الیکشن کا مطالبہ مان لیں تو کہے گا مرضی کا الیکشن کمیشن اور نتائج چاہئیں۔
