اسلام آباد(صباح نیوز)صدر مملکت ڈاکٹر عارف علوی نے ملکی و معاشرتی ترقی کیلئے بچیوں کی تعلیم پر بھی توجہ دینے کی ضرورت پر زور دیتے ہوئے کہا ہے کہ پاکستان میں 2 کروڑ 60 لاکھ سے زائد بچے سکولوں سے باہر ہیں، پاکستان کے تمام بچوں کو تعلیم کی فراہمی کیلئے نجی اور سرکاری شعبے میں تعاون نا گزیر ہے ۔
محمد شفیق خان کی قیادت میں ریڈ فاؤنڈیشن کے وفد سے ملاقات کے دوران اظہار خیال کر رہے تھے۔وفد نے صدر مملکت کو تعلیمی و فلاحی شعبے میں ریڈ فاؤنڈیشن کی خدمات کے بارے میں بتایا کہ ریڈ فاؤنڈیشن ملک بھر میں 400 سے زائد سکول اور کالجز چلا رہی ہے،فاؤنڈیشن معاشرے میں معیاری ، قابل قدر اور بامقصد تعلیم کے فروغ کیلئے کام کر رہی ہے،
فاؤنڈیشن کا مقصد معیاری ، کم قیمت اور مفت تعلیم تک رسائی بڑھاناہے ،ریڈ فاؤنڈیشن یتیم بچوں کی تعلیم و تربیت کیلئے بھی اقدامات کر رہی ہے ۔ صدر مملکت ڈاکٹر عارف علوی نے کہا کہ ملکی انسانی وسائل کی ترقی میں تعلیمی اداروں کا کلیدی کردار ہے ،یتیم بچوں کی تعلیم اور خودمختاری جامع معاشرے کی تشکیل کیلئے ضروری ہے۔صدر مملکت نے تعلیمی اور فلاحی شعبے میں ریڈ فاؤنڈیشن کی خدمات کو سراہا۔۔
