راولپنڈی (صباح نیوز) سیکیورٹی فورسز نے خیبرپختونخوا کے ضلع شمالی وزیرستان میں پاک، افغان بارڈر سے دہشتگردوں کی دراندازی کی کوشش ناکام بنادی جبکہ فائرنگ کے تبادلے میں 8دہشتگرد ہلاک اور 4زخمی ہوگئے۔ پاک فوج کے شعبہ تعلقات عامہ (آئی ایس پی آر)کے مطابق شمالی وزیرستان میں دہشتگردوں کے گروہ کی جانب سے افغان سرحد سے دراندازی کی کوشش کی گئی۔ترجمان پاک فوج کا کہنا تھا کہ سیکیورٹی فورسز نے دہشتگردوں کی دراندازی کی کوشش ناکام بنادی، اس دوران فائرنگ کے تبادلے میں 8دہشتگرد ہلاک اور 4زخمی ہوگئے۔
یاد رہے کہ 22اور 23مارچ کی درمیانی شب میں دہشتگردوں نے شمالی وزیرستان کے علاقے غلام خان کلے میں دراندازی کی کوشش کی تھی۔ جس پر سیکیورٹی فورسز نے بروقت کارروائی کرتے ہوئے شدید فائرنگ کے تبادلے میں 16دہشتگردوں کو ہلاک کردیا تھا۔ آئی ایس پی آر کا کہنا کہ پاکستان بار بار افغان عبوری حکومت سے موثر بارڈر مینجمنٹ کے لیے کہتا رہا ہے۔ توقع ہے افغان عبوری حکومت اپنی ذمہ داریاں پوری کرے گی۔
ترجمان پاک فوج نے مطالبہ کیا ہے کہ افغانستان دہشتگردوں کو پاکستان میں دہشتگردی کے لیے اپنی سرزمین استعمال کرنے سے روکے، سیکیورٹی فورسز اپنی سرحدوں کو محفوظ بنانے کے لیے پرعزم ہیں اور دہشتگردی کا خاتمہ یقینی بنائیں گی۔ واضح رہے کہ افغانستان سے پاکستان میں دراندازی کا سلسلہ تواتر سے جاری ہے جبکہ پاکستان میں دہشتگردی کے واقعات میں افغان دہشتگردوں کے ملوث ہونے میں بتدریج اضافہ دیکھا جارہا ہے۔
