کراچی (صباح نیوز) روڈ ٹو مکہ پراجیکٹ کے تحت سعودی حکومت نے پاکستانی عازمین حج کو پاکستان میں ہی امیگریشن سہولت فراہم کرنے کا فیصلہ کیا ہے۔ پاکستان سے حج کے لیے جانے والے عازمین حج کو کراچی اور اسلام آباد ایئرپورٹس پر امیگریشن سہولت دی جائے گی۔ جس کے بعد عازمین حج کی سعودی عرب میں امیگریشن نہیں ہوگی۔
سعودی سفارتخانے نے پاکستان سول ایوی ایشن (پی سی اے اے) اور ایئرپورٹس اتھارٹی کو مراسلہ جاری کر دیا۔ جس کے مطابق اس سال بھی پاکستانی عازمین حج کی کراچی اور اسلام آباد ایئرپورٹس پر امیگریشن ہوگی۔مراسلہ میں کہا گیا کہ کراچی اور اسلام آباد ایئرپورٹس پر حجاج کی امیگریشن کیلئے جگہ مختص کے لیے اقدامات کیے جائیں اور سعودیہ سے پاکستان آنے والے امیگریشن سامان پر ٹیکس ڈیوٹی سے استثنیٰ دیا جائے۔
مراسلہ میں مزید کہا گیا کہ سعودی حکام سے رابطہ اور کو آرڈینیشن کے لیے رابطہ کار افسران مقرر کیے جائیں اور سعودی امیگریشن حکام کو فوری ویزہ دئیے جائیں۔سعودی سفارتخانے نے کراچی اسلام آباد ایئرپورٹس پر حجاج کے امیگریشن کے انتظامات جلد از جلد مکمل کرنے کی درخواست کر دی۔
