کراچی(صباح نیوز) پیپلز پارٹی سندھ نے چولستان کو سیراب کرنے کے لیے 6 کینالوں کی تعمیر کو متنازع قرار دیتے ہوئے منصوبے کے خلاف احتجاجی تحریک کے دوسرے مرحلے کا اعلان کردیا۔ پیپلز پارٹی سندھ کے صدر نثار کھوڑو نے ایک بیان میں کہا کہ کل 2 اپریل بدھ کو سندھ بھر کے تمام تحصیل ہیڈکوارٹرز میں احتجاجی مشعل بردار ریلیاں نکالی جائیں گے ۔
نثار کھوڑو نے ہدایت کی کہ پیپلز پارٹی کی سندھ بھر کی تحصیل سطح کی تنظیمیں اپنے اپنے تحصیلوں کے ہیڈکوارٹرز میں کینالوں کے خلاف شام کو عوامی قوت کے ساتھ مشعل بردار ریلیاں نکالیں۔ پانی کا مسئلہ ایک دن کے احتجاج کرنے سے حل نہیں ہوگا جس کے لئے مسلسل احتجاج کرکے دبا ڈالنے کی ضرورت ہے۔ پانی کا مسئلہ سندھ کے مستقبل اور زندگی کا سوال ہے۔ عوام کی زندگیاں بچانے کے لئے کینال منصوبے کے خلاف عوام کے ساتھ ہیں۔6 کینالوں کا منصوبہ سندھ کے نقصان میں ہے اس لئے سندھ کے لوگوں کو یہ منصوبہ قبول نہیں ہے۔
کینالوں کے خلاف پیپلز پارٹی اور سندھ کی عوام کا احتجاج اپنے حق کے لئے ہے۔ پیپلز پارٹی کینالوں کے خلاف احتجاج جاری رکھ کر اپنا جمھوری حق استعمال کرتی رہے گی۔ جب تک وفاق کی طرف سے 6 کینالوں کے منصوبے سے دستبرداری کا اعلان نہیں ہوگا تب تک احتجاجی تحریک جاری رہے گی۔ نثار کھوڑو نے کہا کہ کینال منصوبے کے خلاف سب مل کر جدوجھد کرکے سندھ کی حفاظت کریں گے سندھ کے پانی پر ڈاکہ ڈالہ گیا تو مزاحمت کرینگے۔
