غزہ (صباح نیوز) قابض اسرائیلی فوج نے مسلسل دسویں روز بھی غزہ کی پٹی پر درجنوں فضائی حملے کئے اور میزائل داغے۔ شہریوں کے گھروں اور ان کے خیموں کو نشانہ بنایا جس کے نتیجے میں حماس کے ترجمان عبداللطیف القانوع سمیت متعدد شہری شہید اور زخمی ہوگئے۔ غیرملکی خبررساں ادارے کے مطابق قابض فوج نے غزہ کی پٹی میں اسلامی تحریک مزاحمت حماس کے ترجمان عبداللطیف القانوع کے گھر پر بمباری کرکے انہیں ان کے اہلہ خانہ سمیت شہید کردیا۔ قابض فوج نے لیل القدر کی رات پر غزہ کی پٹی پر متعدد حملے کیے جس کے نتیجے میں متعدد افراد شہید اور زخمی ہوئے۔
غزہ شہر کے شمال میں الصفوی علاقے میں احمد یاسین اسٹریٹ پر الغرباوی خاندان کے گھر پر اسرائیلی فضائی حملے میں 6 شہری شہید اور دیگر زخمی ہوگئے۔اسرائیلی قابض فوج نے غزہ کے شمال میں جبالیہ کے مقام پر صبح سویرے ایک چھاپے میں حماس کے ترجمان عبداللطیف القانوع کو شہید کر دیا۔قابض اسرائیلی فوج کے جنگی طیاروں نے غزہ شہر پر نئے حملے کیے ہیں۔خان یونس کے مغرب میں المواسی کے علاقے میں بے گھر ہونے والے ایک ٹینٹ ہاس کو نشانہ بنایا گیا جس کے نتیجے ایک شہری شہید اور دیگر زخمی ہوئے۔سول ڈیفنس نے کہاکہ ہم نے اسرائیلی بمباری کے نتیجے میں ایک شہری کی شہادت اور 10 زخمیوں کی تصدیق کی ہے۔غزہ شہر کے مغرب میں القدس اوپن یونیورسٹی کے قریب ایک گھر پر اسرائیلی جنگی طیاروں کی بمباری سے ایک شہری ہلاک اور دیگر زخمی ہو گئے۔اسرائیلی بمباری میں شہری زخمی ہوئے جس میں خان یونس کے شمال میں القراراہ کے مرکز میں ایک مکان کو نشانہ بنایا گیا۔
