پشاور(صباح نیوز)جماعت اسلامی خیبر پختونخوا وسطی کے امیر عبدالواسع نے حافظ نعیم الرحمن کے پشاور میں 20 اپریل کو ہونے والے امن مارچ کے اعلان کا خیرمقدم کیا ہے۔ ان کا کہنا تھا کہ صوبے میں جاری بد امنی، دہشت گردی اور سیکیورٹی کے مسائل نے عوام کی زندگی کو متاثر کر دیا ہے، اور ایسی صورتحال میں امن مارچ کا انعقاد ایک اہم قدم ہے جو امن کے قیام کی راہ ہموار کرے گا۔
اپنے بیان میں عبدالواسع نے کہا کہ صوبائی اور مرکزی حکومتیں اور سیکیورٹی ادارے اس وقت امن و امان قائم کرنے میں مکمل طور پر ناکام ہو چکے ہیں، اور اس بے چینی کے ماحول میں حافظ نعیم الرحمن کا قدم حقیقت میں ایک اہم سنگ میل ثابت ہوگا۔ اس امن مارچ سے عوام میں ایک نیا حوصلہ اور اعتماد پیدا ہوگا کہ امن و سکون واپس آ سکتا ہے۔انہوں نے مزید کہا کہ جماعت اسلامی ہمیشہ سے ہی امن، محبت، اور بھائی چارے کی داعی رہی ہے، اور ہم اس مارچ میں بھرپور شرکت کریں گے تاکہ پشاور اور خیبر پختونخوا کے عوام کو امن کا پیغام دیا جا سکے۔عبدالواسع نے عوام سے اپیل کی کہ وہ اس امن مارچ میں شرکت کریں اور اپنے حقوق کے تحفظ اور امن کے قیام کے لئے اس کوشش کا حصہ بنیں۔
