اسلام آباد (صباح نیوز)وفاقی حکومت نے پی ٹی آئی کو مذاکرات کے ٹیبل پر لانے کے لیے بلاول بھٹو کی ثالثی کی پیشکش قبول کرتے ہوئے بات چیت کی ذمہ داری بھی انہی کو دے دی۔ وزیراعظم کے مشیر برائے سیاسی امور رانا ثنااللہ نے کہاکہ اگر بلاول بھٹو کا پی ٹی آئی سے اتفاق رائے ہو جاتا ہے تو پھر قومی سلامتی کمیٹی کا اجلاس دوبارہ بلائے جانے میں کوئی حرج نہیں۔
ایک نجی ٹی وی سے گفتگو میں انہوں نے کہاکہ اگر بلاول بھٹو پی ٹی آئی کو مذاکرات کے ٹیبل پر لانے میں کامیاب ہو جاتے ہیں تو یقینا یہ بہت بڑی کامیابی ہوگی۔ رانا ثنااللہ نے کہاکہ پیکا قانون ناگزیر ہے، تاہم اس کے غلط استعمال کے معاملے پر بیٹھ کر بات چیت کرنی چاہیے۔ واضح رہے کہ گزشتہ روز چیئرمین پیپلزپارٹی بلاول بھٹو نے کہا تھا کہ ہمیں بلوچستان اور خیبرپختونخوا پر توجہ دینے کی ضرورت ہے، تمام جماعتیں ملک و قوم کی خاطر متحد ہو جائیں۔
ان کا کہنا تھا کہ پیپلزپارٹی حکومت اور اپوزیشن دونوں سے بات کرنے کی پوزیشن میں ہے، وہ جماعتیں جو قومی سلامتی کمیٹی اجلاس میں شریک نہیں تھیں انہیں انگیج کرنے کو تیار ہیں۔ بلاول بھٹو نے کہاکہ بلوچستان اور خیبرپختونخوا کی صورت حال تشویشناک ہے، پوری قوم اور تمام جماعتیں دہشتگردوں کا مقابلہ کرنے کے لیے متحد ہو جائیں۔
