انقرہ(صباح نیوز) پاکستان کے قومی دن کو روایتی جوش و جذبے کے ساتھ منانے کے لیے انقرہ میں پاکستانی سفارتخانے میں پرچم کشائی کی تقریب کا انعقاد کیا گیا۔ ترکی میں پاکستان کے سفیر ڈاکٹر یوسف جنید نے معزز مہمانوں اور پاکستانی کمیونٹی کی موجودگی میں قومی ترانے کی دھن پر پاکستان کا قومی پرچم لہرایا۔ اس موقع پر صدر مملکت اور وزیراعظم پاکستان کے خصوصی پیغامات پڑھ کر سنائے گئے۔ اپنے پیغامات میں قیادت نے قوم کو مبارکباد پیش کی اور قائداعظم محمد علی جناح اور ان کے ساتھیوں کی دور اندیش قیادت کو خراج عقیدت پیش کیا۔ قیادت نے حق خودارادیت کے کشمیریوں کے جائز مطالبے سے بھی یکجہتی کا اظہار کیا۔
اس موقع پر خطاب کرتے ہوئے سفیر جنید نے یوم پاکستان کی تاریخی اہمیت کو اجاگر کیا۔ انہوں نے اس بات پر روشنی ڈالی کہ 23 مارچ برصغیر کے مسلمانوں کے لیے ایک آزاد وطن کے قیام کی جدوجہد میں بانیوں کی جانب سے دی گئی بے پناہ قربانیوں کی یاد دہانی کے طور پر کام کرتا ہے۔ انہوں نے اس بات پر زور دیا کہ قرارداد پاکستان کی روح ہمیں یاد دلاتی ہے کہ اتحاد، ایمان، نظم و ضبط کامیابی کے لیے ہمارا رہنما اصول ہونا چاہیے۔ انہوں نے مزید کہا کہ ‘پاکستان کا سفر ثابت قدمی اور غیر متزلزل عزم سے تشکیل پایا ہے اور آج بحیثیت قوم ہم پاکستان کے امن، سلامتی اور ترقی کے لیے اپنا بھرپور کردار ادا کرنے کے عزم کا اعادہ کرتے ہیں’۔ شہدا اور سابق فوجیوں سے اظہار تشکر کرتے ہوئے، سفیر نے پاکستان کی مسلح افواج اور قانون نافذ کرنے والے اداروں کو زبردست خراج تحسین پیش کیا، جو پاکستان کی خودمختاری اور استحکام کی بڑی بہادری سے حفاظت کر رہے ہیں۔
سفیر جنید نے مبارکباد کے پیغامات بھیجنے اور باسفورس پر ایشیا کو یورپ سے ملانے والے پلوں کو پاکستان کے پرچم کے رنگوں میں روشن کرکے یوم پاکستان کی تقریبات میں شامل ہونے پر ترک قیادت اور عوام کا شکریہ ادا کیا۔ انقرہ کے بلند ترین ٹاور اتاکولے پر بھی مبارکباد کے پیغامات آویزاں کیے گئے۔ 23 مارچ پاکستان کی تاریخ کا ایک اہم دن ہے۔ اسی دن 1940 میں، برصغیر کے مسلمانوں کے لیے ایک علیحدہ ریاست کا مطالبہ کرنے والی قرارداد لاہور، جو بعد میں قرارداد پاکستان کے نام سے مشہور ہوئی۔ 23 مارچ 1940 کو دیکھا گیا خواب 14 اگست 1947 کو پاکستان کی صورت میں حقیقت بن گیا۔ ***
