کوالالمپور(صباح نیوز) کوالالمپور میں پاکستانی ہائی کمیشن میں منعقدہ پرچم کشائی کی تقریب میں مختلف شعبہ ہائے زندگی کی نمائندگی کرنے والے پاکستانی کمیونٹی کی بڑی تعداد نے شرکت کی۔
تقریب میں پاکستان کے ملائیشین دوستوں نے بھی شرکت کی۔ہائی کمشنر سید احسن رضا شاہ نے قومی پرچم بلند کیا، جبکہ حاضرین نے یک زبان ہو کر قومی ترانہ گایا۔تقریب کے دوران صدر آصف علی زرداری، وزیراعظم محمد شہباز شریف اور نائب وزیراعظم/وزیر خارجہ سینیٹر محمد اسحاق ڈار کے پیغامات پڑھ کر سنائے گئے۔
اپنے خطاب میں ہائی کمشنر نے پاکستان کی آزادی کی جدوجہد میں قوم کے آبائواجداد کی قربانیوں کو خراج تحسین پیش کیا۔انہوں نے بانی بابا قائداعظم محمد علی جناح کی وراثت کو خراج تحسین پیش کیا اور اس بات پر زور دیا کہ اس دن نے قوم کے جذبے کو زندہ کرنے کا کام کیا۔ہائی کمشنر نے پاکستان اور ملائیشیا کے درمیان مضبوط، تاریخی دوطرفہ تعلقات پر بھی روشنی ڈالی، جن کی جڑیں مشترکہ ورثے اور ثقافت میں ہیں۔
انہوں نے یقین ظاہر کیا کہ یہ تعلقات آنے والے سالوں میں مزید گہرے ہوتے رہیں گے۔انہوں نے کہا کہ ہمیں بھارت کے غیر قانونی طور پر مقبوضہ جموں و کشمیر (IIOJK) کے لوگوں کی قربانیوں کو بھی یاد رکھنا چاہیے جنہیں مظالم اور انسانی حقوق کی خلاف ورزیوں کا سامنا کرنا پڑتا ہے۔
