اسلام آباد(صباح نیوز ) وزیر اعظم میاںمحمد شہباز شریف کا دورہ سعودی عرب سے واپسی کے فوری بعد ایف بی آر کی کارکردگی پر اجلاس۔ 34.5ارب روپے کی ریکوری پر متعلقہ وزرا و افسران کی پذیرائی۔ مستقل نظام کی تشکیل کیلئے لائحہ عمل طلب ۔وزیرِ اعظم کی وزیرِ قانون و انصاف اعظم نذیر تارڑ، وزیرِ خزانہ محمد اورنگزیب، وزیرِ اقتصادی امور احد خان چیمہ، وزیرِ اطلاعات و نشریات عطا اللہ تارڑایڈووکیٹ، مشیر وزیرِ اعظم ڈاکٹر سید توقیر شاہ، اٹارنی جنرل منصورعثمان اعوان، سیکرٹری خزانہ امداد اللہ بوصال، سیکرٹری اطلاعات ونشریات عنبرین جان، چیئرمین ایف بی آر راشد محمود لنگڑیال، ڈائریکٹر جنرل انٹیلی جنس بیورو فواد اسداللہ خان، ڈائریکٹر جنرل ایف آئی اے جان محمد اور متعلقہ تمام افسران کی اس تاریخی ریکوری کیلئے اقدامات کی خصوصی تعریف۔
وزیراعظم محمد شریف نے کہا کہ مجھ سمیت پوری قوم آپ کی قومی خزانے کو 34.5ارب روپے کا فائدہ پہنچانے پر مشکور ہے۔فیصلے کے بعد 24گھنٹوں کے اندر ریکوری قابل ستائش اقدام ہے۔ انہوں نے کہا کہ ایسے بہترین نتائج ظاہر کرتے ہیں کہ محنت و لگن سچی ہو تو کامیابی ضرور ملتی ہے۔تاریخی کام آپ جیسی محنتی ٹیم کے ساتھ ہی ممکن تھا۔
وزیرِ اعظم نے کہا کہ 34.5ارب کی ریکوری ایک اچھی شروعات ہے لیکن ابھی ہمارا سفر شروع ہوا ہے۔ہمیں مستقل بنیادوں پر ایک پائیدار نظام تشکیل دینا ہے۔ انہوں نے کہا کہ دہائیوں کی خرابیوں کو ہمیں مل کر ٹھیک کرنا ہے۔ وزیرِ اعظم نے ہدایت کی کہ ایف بی آر کی ریکوریوں کے حوالے سے مستقل بنیادوں پر مربوط قانونی ڈھانچہ تشکیل دیا جائے۔ ایف بی آر کے حوالے سے اصلاحات و ٹیکس قوانین پر عملدرآمد کو یقینی بنانے کے حوالے سے بھی ایک لائحہ عمل تشکیل دے کر پیش کیا جائے۔ایف بی آر کی افرادی قوت کی بہتری کیلئے ایک پلان تشکیل دیا جائے۔ انہوں نے کہا کہ سو فیصد ڈیجیٹائیزیشن، تھرڈ پارٹی ویلیڈیشن اور مسلسل نگرانی سے ہی نظام میں بہتری آئے گی۔ایسے افسران و اہلکار جو کسی بھی قسم کی خردبرد میں ملوث پائے جائیں ان کے خلاف بھرپور کاروائی عمل میں لائی جائے۔ وزیراعظم نے کہا کہ اچھی کارکردگی والے افسران و اہلکاروں کی ستائش بھی یقینی بنائی جائے اگر ہمیں پاکستان کی تقدیر کو بدلنا ہے تو نظام میں مستقل بنیادوں پر تبدیلی نا گزیر ہے۔
انہوں نے کہا کہ عوام کی ایک ایک پائی کی حفاظت کیلئے جس قدر ہوسکا، کوشش کریں گے۔ وزیرِاعظم شہباز شریف کا ایف بی آر کی کارکردگی پر اجلاس ہفتہ کو اسلام آباد میں منعقد ہوا.اجلاس میں وفاقی وزرا اعظم نذیر تارڑ، احد خان چیمہ، مشیر وزیر اعظم سید توقیر شاہ، اٹارنی جنرل منصور اعوان، سیکرٹری خزانہ امداد اللہ بوصال، سیکرٹری اطلاعات عنبرین جان، چیئرمین ایف بی آر راشد محمود لنگڑیال اور ڈائریکٹر جنرل انٹیلی جنس بیورو فواد اسداللہ خان شریک تھے۔اجلاس میں وزیرِ اعظم کو ٹیکس کے حوالے سے عدالتوں میں زیر التوا مقدمات کے حوالے سے بریفنگ اور حکومتی ٹیم کے ان مقدمات کی ریکوری کے حوالے سے اقدامات پر بریفنگ دی گئی۔ اجلاس میں چیئرمین ایف بی آر نے وزیرِ اعظم کو ایف بی آر کے ڈائریکٹریٹ آف لا ء کی اصلاحات، ٹیکس جانچ کیلئے ڈیجیٹل ایلگوریدھم، ٹیکس افسران کی کارکردگی کی جانچ کے ساتھ ساتھ مجموعی طور پر ایف بی آر کی جاری اصلاحات کے حوالے سے بریفنگ دی۔ وزیرِ اعظم کی چیئرمین ایف بی کی جانب سے اقدامات کی پذیرائی کرتے ہوئے مستقل بنیادوں پر ایک مربوط نظام کے حوالے سے لائحہ عمل تشکیل دے کر پیش کرنے کی ہدایت کی۔
