کوئٹہ(صباح نیوز) صدرمملکت آصف علی زرداری نے بلوچستان میں ترقی اور پائیدار امن پر زور دیتے ہوئے کہا ہے کہ دہشتگرد عناصر کو ہر قیمت پر شکست دیں گے۔ دہشتگرد قوم کو تقسیم کرنا چاہ رہے ہیں۔ کوئٹہ میں صدر مملکت آصف علی زرداری کی زیر صدارت امن و امان کی صورتحال پر اہم اجلاس منعقد ہوا ۔چیئرمین پاکستان پیپلزپارٹی (پی پی پی) بلاول بھٹو زرداری نے خصوصی شرکت کی۔ وزیر اعلی بلوچستان میر سرفراز بگٹی نے اجلاس کو صوبے میں امن و امان کی صورت حال پر بریفنگ دی۔
اس موقع پر صدر مملکت آصف علی زرداری نے بتایا کہ دہشتگرد عناصر کو ہر قیمت پر شکست دیں گے، دہشتگرد قوم کو تقسیم کرنا چاہ رہے ہیں۔ انہوں نے کہا کہ صورتحال واضح ہے ریاست کو رہنا ہے، دہشتگردی کے خلاف جنگ جیتنی ہے لہذا انسداد دہشتگردی ونگ کو جدید اسلحہ فراہم کریں گے۔ صدر مملکت کا کہنا تھا کہ بلوچستان دل کے قریب ہے، صوبے کی ترقی اور پائیدار امن چاہتے ہیں، بلوچستان کے ہر بچے کو اسکول میں دیکھنا چاہتے ہیں۔ ان کا کہنا تھا کہ جدید ٹیکنالوجی سے بچوں کو روشناس کروانا وقت کی ضرورت ہے۔اجلاس میں قائم مقام گورنر بلوچستان کیپٹن (ر) عبدالخالق اچکزئی، چیف سیکریٹری بلوچستان شکیل قادر خان، آئی جی پولیس معظم جاہ انصاری سمیت اعلی حکام نے شرکت کی۔
