اسلام آباد(صباح نیوز)نومنتخب چیف جسٹس یحیی آفریدی نے سپریم کورٹ کی تمام عدالتوں کو لائیو سٹریمنگ سروس فراہم کرنے کا فیصلہ کرتے ہوئے خصوصی ہدایات جاری کردی ہیں تاہم اس سے سائلین کی رضامندی سے مشروط کردیا ہے۔میڈیا رپورٹس کے مطابق چیف جسٹس نے سپریم کورٹ کے جج جسٹس محمد علی مظہر کو اس حوالے سے ٹاسک دیا ہے۔
اس منصوبے کے تحت سپریم کورٹ کی تمام کورٹ رومز میں لائیو سٹریمنگ سروس فراہم کی جائے گی۔ذرائع کے مطابق لائیو سٹریمنگ کی سروس چیف جسٹس یحیی آفریدی کی خصوصی ہدایات پر کی جا رہی ہے، لائیو سٹریمنگ کی سروس سائلین کی رضامندی کے ساتھ مشروط ہوگی، کسی خاتون سائل کی رضامندی کے تحت کیس کی سماعت میں رازداری برتی جائے گی۔ذرائع نے بتایا کہ لائیو سٹریمنگ کی سروس کے تحت عدالت کی کارروائی تک دنیا بھر سے رسائی حاصل ہوگی، اس کے تحت اوورسیز پاکستانی سائلین بھی اپنے مقدمات کی سماعت براہِ راست دیکھ سکیں گے۔
ذرائع کے مطابق لائیو سٹریمنگ سروس کے لیے مطلوبہ کیمرے سمیت دیگر آلات کی خریداری کے لیے جائزہ لیا جا رہا ہے، سروس کے لیے کمیٹی پروپوزل تیار کرکے حتمی منظوری کے لیے چیف جسٹس پاکستان کو بھجوائے گی۔خیال رہے کہ اس وقت سپریم کورٹ کے صرف کمرہ عدالت نمبر ایک میں لائیو سٹریمنگ سروس فراہم کی گئی ہے جو سابق چیف جسٹس قاضی فائز عیسی کے دور میں شروع کی گئی تھی۔۔
