لاہو ر(صباح نیوز)امیر جماعت اسلامی حافظ نعیم الرحمن نے کہا ہے کہ جماعت اسلامی جمعہ 25اکتوبر کو ملک بھر میں اہل فلسطین سے یکجہتی کا اظہار کرے گی۔ منصورہ سے جاری بیان میں انہوں نے اسرائیلی افواج کی جانب سے فلسطین میں جاری نسل کشی اور مظالم کے خلاف حماس کی اپیل پر دنیا بھر میں مظاہروں کی اپیل پر مکمل حمایت کا اعلان کیا اور اس عہد کا اعادہ کیا کہ اہل پاکستان دکھ اور کرب کی گھڑی اور آزمائش میں اہل غزہ کے ساتھ ہیں۔
انہوں نے جماعت اسلامی کی برادر تنظیمات کو بھی ہدایات جاری کیں کہ حماس کی اپیل کے تناظر میں ملک بھر میں ریلیوں اور مظاہروں کا اہتمام کیا جائے۔ انہوں نے کہا کہ علمائے کرام مساجد میں نماز جمعہ کے خطبات میں خصوصی طور پر فلسطین کی تحریک آزادی، مجاہدین کی قربانیوں کا تذکرہ کریں، ان کی کامیابی کے لیے خصوصی دعاؤں کا اہتمام کیا جائے اور عوام میں بیداری پیدا کی جائے۔
