اسلام آباد(صباح نیوز)توشہ خانہ ٹو کیس میں بانی پی ٹی آئی کی اہلیہ بشریٰ بی بی نے ضمانت بعد از گرفتاری کے لئے اسلام آباد ہائی کورٹ سے رجوع کر لیا۔ بشریٰ بی بی نے درخواست ضمانت خالد یوسف چوہدری کے ذریعے دائر کی۔
درخواست میں موقف اپنایا گیا کہ درخواست گزار گھریلو اور پردہ نشین خاتون ہے، الزامات جھوٹے اور گواہان کو بلیک میل کر کے لگوائے گئے ہیں۔ ایف آئی اے نے قانون کی خلاف ورزی کی ہے جبکہ مقدمہ اور تفتیش بد دیانتی پر مبنی ہے۔
درخواست میں موقف دیا گیا کہ استغاثہ نے درخواست گزار کو جیل میں رکھنے کے لیے مقدمہ کھڑا کیا ہے، مقدمہ دائر کرنے سے پہلے ہی ہائی کورٹ میں چیلنج کیا ہوا تھا۔ بار بار ایک ہی کیس کو مختلف زاویوں سے چلانا آئینی خلاف ورزی ہے لہذا اسلام آباد ہائی کورٹ ضمانت بعد از گرفتاری کی درخواست منظور کرے۔واضح رہے کہ بشریٰ بی بی کی درخواست ضمانت سپیشل جج سینٹرل اسلام آباد نے 30 ستمبر کو مسترد کر دی تھی۔
