لاہور (صباح نیوز)لاہور ہائی کورٹ نے شوہر کی وفات کے بعد بیوہ کو دوسری شادی پر سرکاری نوکری سے برطرفی کے حوالے سے تحریری فیصلہ جاری کردیا۔لاہور ہائی کورٹ نے واضح کردیا کہ سرکاری ملازم شوہر کی بیوہ کو ملنے والی نوکری اس کی دوسری شادی پر ختم نہیں ہو سکتی۔
لاہور ہائی کورٹ کے جسٹس چودھری محمد اقبال کی سربراہی میں 2 رکنی بینچ نے خاتون زویا اسلام کی اپیل پر9 صفحات کا تحریری فیصلہ جاری کر دیا۔فیصلے کے مطابق شوہر کی وفات کے بعد بیوہ کو دوسری شادی پر سرکاری نوکری سے برطرف نہیں کیا جائے گا۔فیصلے میں کہا گیا کہ بیوہ شادی کر سکتی ہے، ہمارے مذہب میں یہ ایک عورت کا بنیادی حق ہے، بیوہ کو دوسری شادی کی بنیاد پر نوکری سے نکالنا شرعی قوانین کی خلاف ورزی ہے۔عدالتی فیصلے میں کہا گیا ہے کہ جس قانون کی بنیاد پر بیوہ کو نوکری سے نکالا گیا اس پر سپریم کورٹ کا فیصلہ آ چکا ہے، عدالت سنگل بینچ کا فیصلہ اور بیوہ کو نوکری سے نکالنے کا نوٹیفکیشن کالعدم قرار دیتی ہے اور بیوہ زویا اسلام کی اپیل کو منظور کرتی ہے۔
اس حوالے سے اپیل میں موقف اپنایا گیا تھا کہ سرکاری ملازم شوہر کی وفات کے بعد نائب قاصد کی نوکری 2020 میں ملی، شوہر اسلام کی بیوہ ہونے کی وجہ سے سرکاری نوکری ملی۔خاتون نے موقف اپنایا تھا کہ 2021 میں دوسری شادی کی جس کی بنیاد پر نوکری سے برطرف کیا گیا، ہمارا مذہب اسلام اور شریعت بیوہ کو شادی کی اجازت دیتا ہے۔
