اسلام آباد (صباح نیوز)وفاقی وزیر داخلہ سینیٹر محسن نقوی کی صدارت میں سی ڈی اے میں اہم اجلاس ہوا۔ اسلام آباد کو عالمی معیار کا شہر بنانے کے لئے اہم فیصلے کیے گئے ہیں۔وزیر داخلہ کی ہدایت پر ماحولیاتی آلودگی میں کمی لانے کے لئے سی ڈی اے آئندہ سے صرف الیکٹرک بائیکس خریدے گی۔ اسکے علاوہ اسلام آباد کے شہریوں کے لئے ماحول دوست الیکٹرک بسیں چلائی جائیں گی۔ وزیرداخلہ نے پٹرول موٹر سائیکلز خریدنے پر پابندی عائد کردی۔ اسلام آباد کے شہریوں کو انٹرنیشنل سٹینڈرڈ کی ایمرجنسی سروسز فراہم کی جائیں گی۔ ایمرجنسی سروسز کو ایم سی آئی سے سی ڈی اے کو منتقل کرنے کا فیصلہ کیا گیا۔ کیپٹل واسا کا قیام بھی جلد عمل میں لایا جائے گا۔ علاوہ ازیںکیپیٹل ویسٹ مینجمنٹ کمپنی کے قیام کے لئے متعلقہ امور کو جلد حتمی شکل دی جائے گی۔ اس موقع پر وفاقی وزیر داخلہ نے کہا کہ اسلام آباد میں ٹریفک کے مسائل کو کم کرنے کے لیے سرینا چوک انڈر پاس اور ایف نائن پارک چوک فلائی اوور منصوبوں پر تعمیراتی کام جلد شروع کر دیا جائے گا۔ طویل مدت سے زیر التوا ایکسپریس وے کے منصوبے کو مکمل کرنے کے لیے کام کی رفتار تیز کی جائے گی۔
انہوں نے مزید کہا کہ اسلام اباد کے کئی برس سے نان ڈویلپ سکیٹرز میں ترقیاتی کاموں کو مکمل کرکے لوگوں کو قبضہ دیا جائے گا۔ 17 برس سے تعطل کا شکار اسلام آباد ماڈل جیل پر کام تیزی سے جاری ہے، پہلے مرحلہ کو مقررہ مدت میں مکمل کیا جائے گا۔ وزیر داخلہ نے کہا کہ اسلام آباد میں بزنس فیسلیٹشن سنٹر بنائے جا رہے ہیں جہاں سرمایہ کاروں کو سہولیات ایک چھت تلے فراہم کی جائیں گی۔ سیکٹر ایچ سولہ میں ہیلتھ ٹاور کیلئے زمین کی الاٹمنٹ کر دی گئی ہے۔ وزیر داخلہ کی ریکارڈ ٹیکس وصولی پر چیئرمین سی ڈی اے سمیت پوری ٹیم کو مبارکباد دی۔ لیکن ساتھ یہ بھی تنبیہہ کی کہ صرف پلاٹ اور زمیں بیچ کر کوئی ادارہ نہیں چل سکتا، ضروری ہے کہ ادارے کے اثاثے بڑھائے جائیں۔ اس سلسلے میں وزیر داخلہ نے ہدایت کی کہ انوسمنٹ پلان مرتب کرکے 7 روز میں پیش کیا جائے گا۔ اجلاس میں جاری ترقیاتی منصوبوں پر پیش رفت کا تفصیلی جائزہ بھی لیا گیا۔ جس میں کری انکلیو ، فیڈرل سیکرٹریٹ کی عمارت کی تزئین و آرائش، ڈپلومیٹک انکلیو اور سمارٹ پارکنگ کے منصوبوں پرپیش رفت پر بھی غور کیا گیا۔ چیئرمین سی ڈی اے محمد علی رندھاوا نے وفاقی وزیر داخلہ کو مختلف منصوبوں پر تفصیلی بریفننگ دی۔ اجلاس میں چیئرمین سی ڈی اے محمد علی رندھاوا، ڈپٹی کمشنر اسلام آباد عرفان میمن اور سی ڈی اے کے تمام ممبران نے شرکت کی۔
