اسلام آباد(صباح نیوز) وزیراعظم محمد شہبازشریف نے صنعت اور برآمدات میں بڑے اضافے کے لئے تاریخی قدم اٹھاتے ہوئے صنعتوں کے لئے بجلی کی قیمت میں 10روپے 69 پیسے فی یونٹ کی کمی کردی ہے۔
پی ایم آفس کے اعلامیہ کے مطابق وزیراعظم کی خصوصی کاوشوں سے صنعت اور برآمدات کے شعبے کے لئے بجلی کی قیمت 34 روپے 99 پیسے فی یونٹ مقرر کی گئی ہے، نیپرا نے صنعتوں کے لئے بجلی کی قیمت میں10روپے69 پیسے فی یونٹ کمی تجویز کی تھی۔وزیراعظم کے پیکج کے نتیجے میں صنعتوں سے 200 ارب روپے سے زائد کا بوجھ ختم ہوگا، صنعتوں کو یہ پیکج عالمی منڈی میں اشیا کی لاگت کے مقابلے کے قابل بنانے کے لئے کیا گیا۔ماہرین کے مطابق اس پیکج سے صنعتی اور زرعی مصنوعات کی پیداواری لاگت میں کمی اور برآمدات میں خاطر خواہ اضافہ ہو گا، صنعتی ترقی کی رفتار مزید تیز ہوگی، روزگار میں تیزترین اضافہ ہوگا اور صنعتوں کے پہیے کی رفتار تیز اور برآمدات میں اضافے سے ملکی معیشت کو فائدہ ہوگا
