ابوظبہی (صباح نیوز)انٹرنیشنل کرکٹ کونسل (آئی سی سی) نے ابوظہبی ٹی 10 ایونٹ میں میچ فکسنگ کی تحقیقات میں آٹھ کرکٹ کھلاڑیوں اور آفیشلز پر اینٹی کرپشن قوانین کی خلاف ورزی کا الزام عائد کیا ہے۔کرکٹ کی گورننگ باڈی نے ایک بیان میں کہا، آئی سی سی نے، امارات کرکٹ بورڈ(ای سی بی) کی جانب سے آٹھ کھلاڑیوں اور آفیشلز پر ٹی 10 لیگ کے شرکا پر ای سی بی کے انسداد بدعنوانی کوڈ کی مختلف خلاف ورزیوں پر فرد جرم عائد کی ہے۔
آئی سی سی نے کہا کہ یہ الزامات 2021 میں ابوظہبی ٹی 10 کرکٹ لیگ اور اس ٹورنامنٹ میں میچوں کو خراب کرنے کی کوششوں سے متعلق ہیں جنہیں روک دیا گیا تھا۔لگائے گئے الزامات کی زد میں بنگلہ دیش کے کھلاڑی ناصر حسین اور ٹیم کے شریک مالکان کرشنن کمار چودھری اور پیراگ سنگھوی بھی ہیں۔گروپ کے خلاف متعدد الزامات میں میچ فکسنگ، کھلاڑیوں کو بدعنوانی میں ملوث ہونے کے لیے رقم کی پیشکش اور آئی سی سی کی تحقیقات میں تعاون کرنے میں ناکامی شامل ہیں۔چودھری اور سنگھوی سمیت چھ افراد کو ان کے مبینہ طرز عمل کی وجہ سے عارضی طور پر معطل کر دیا گیا ہے اور ان کے پاس جواب دینے کے لیے دو ہفتے کا وقت ہے۔
