کراچی (صباح نیوز)عالمی وبا کورونا وائرس کے نئے ویریئنٹ اومیکرون کے تیزی سے پھیلاؤ کے پیش نظر وزیراعلی سندھ سید مراد علی شاہ کی جانب سے ویکسینیشن بھی زیادہ کرنے کی ہدایت کی گئی ہے۔
وزیراعلی سندھ سید مراد علی شاہ کی صدارت میں کورونا وائرس سے متعلق صوبائی ٹاسک فورس کا اجلاس ہوا۔اجلاس میں وزیرِ صحت ڈاکٹر عذرا پیچوہو، مشیر قانون مرتضی وہاب، پارلیمینٹری سیکریٹری قاسم سومرو، قائم مقام چیف سیکریٹری قاضی شاہد پرویز، پرنسپل سیکریٹری ساجد جمال ابڑو، ڈاکٹر باری، سیکریٹری صحت ذوالفقار شاہ، کمشنر کراچی اور دیگر متعلقہ افسران شریک ہوئے۔
اس دوران حیدرآباد، سکھر، میرپورخاص اور شہید بینظیرآباد کے کمشنرز نے بذریعہ ویڈیو لنک اجلاس میں شرکت کی۔اجلاس میں بریفنگ کے دوران بتایا گیا کہ 3 دسمبر 2021 کو سندھ میں 261 کوویڈ کیسز تھے جبکہ2 جنوری 2022 کو 403 کیسز رپورٹ ہوئے ہیں۔بریفنگ کے دوران مزید بتایا گیا کہ دسمبر 2021 میں اومیکرون ٹیسٹ کرنے کے لیے 351 ٹیسٹ کیے گئے ہیں، 315 ٹیسٹ میں 175 اومی کرون کے کیسز ظاہر ہوئے۔اجالس کے دوران دی گئی بریفنگ کے مطابق گزشتہ سات روز میں کراچی میں 4.91 فیصد، حیدرآباد 1.41 فیصد اور صوبے کے باقی اضلاع میں 1.12 فیصد کیسز رپورٹ ہوئے ہیں،
ہفتہ وار کوویڈ کیسز کے حوالے سے کراچی شرقی اور جنوبی میں 8 فیصد کیسز آئے ہیں۔کراچی غربی میں 4، کراچی وسطی، گھوٹکی، مٹیاری اور میرپورخاص میں 2-2 فیصد کیسز رپورٹ ہوئے۔اجلاس کو بریفنگ کے دوران مزید بتایا گیا کہ گزشتہ 30 یوم میں 51 کوویڈ مریض انتقال کر گئے ہیں، 51 میں سے 40 مریضوں کی اسپتال میں وینٹی لیٹرز پر انتقال ہوا جبکہ 6 انتقال کرنے والے مریض وینٹ پر نہیں تھے، 5 مریضوں کا انتقال گھروں میں ہوا ہے۔
اجلاس سے خطاب کے دوران وزیراعلی سندھ سید مراد علی شاہ نے کہا کہ اس سے ظاہر ہوتا ہے کہ کیسز میں اضافہ ہو رہا ہے، ہمارے لوگوں کو مزید احتیاط کرنے ہوں گی۔اس دوران وزیراعلی سندھ نے کراچی اور حیدرآباد میں 7000 ٹیسٹ سے زیادہ ٹیسٹ کرنے کی بھی ہدایت جاری کی۔
کراچی میں اومی کرون ویرئینٹ جنگل کی آگ کی طرح پھیل رہا ہے،ماہرین صحت
وفاقی ماہرین صحت نے کہا ہے کہ کراچی میں اومی کرون ویرئینٹ جنگل کی آگ کی طرح پھیل رہا ہے۔ محکمہ صحت سندھ نے شہر میں مزید 10 افراد میں اومی کرون ویریئنٹ کی تصدیق کی ہے۔
حکام محکمہ صحت کے مطابق کراچی میں اومی کرون کے کیسز میں مسلسل اضافہ جاری ہے، مزید 10 نئے کیسز کے بعد اب شہر میں اومی کرون ویریئنٹ کے مریضوں کے تعداد 54 ہوگئی ہے۔وفاقی حکام کا کہنا ہے کہ کراچی میں اومی کرون ویرئینٹ جنگل کی آگ کی طرح پھیل رہا ہے جس کے سبب شہرقائد میں کورونا مثبت کیسزکی شرح7 فیصد ہوچکی ہے۔
حکام کا کہنا ہے کہ کراچی میں ویکسینیشن کی شرح محض 40 فیصد ہے جس سے کیسز بڑھ رہے ہیں، کراچی کے بعد اگلا نمبر لاہور کا ہے جہاں اومی کرون کی وجہ سے کیسز بڑھنے لگے ہیں۔وفاقی حکام نے بتایا کہ اسلام آباد میں بھی اومی کرون کی کمیونٹی ٹرانسمیشن شروع ہوچکی ہے۔
ڈاکٹر فیصل محمودنے کہا کہ کراچی میں کیسز روکنے کے لیے سخت اقدامات کی ضرورت ہے، کورونا کیسز بڑھنے سے اسپتالوں میں مریضوں کے داخلے بھی بڑھیں گے،یہ کہنا قبل از وقت ہے کہ اومی کرون ویریئنٹ کم خطرناک ہے۔
