مدینہ منورہ(صباح نیوز)وزیر خزانہ اسحق نے دنیا بھر میں مقیم پاکستانیوں سے کہا ہے کہ وہ حکومت کی کامیابی کیلیے دعا کریں، پاکستان کو جلد معاشی بحران سے نکال لیں گے۔
انہوں نے ان خیالات کا اظہار مدینہ منورہ میں ن لیگ جاپان کے چیئرمین ملک یونس سمیت دیگر اوورسیز پاکستانیوں سے ملاقات میں کیا۔اسحق ڈار نے کہا کہ پی ڈی ایم کی حکومت سابقہ حکومت کی جانب سے بحران میں پاکستان کو مشکلات سے نکالنے کے لیے دن رات کام کر رہی ہے، امید ہے پوری قوم کے تعاون سے پاکستان کو بحران سے نکال لیں گے۔
اس موقع پر ن لیگ جاپان کے چیئرمین ملک یونس نے اسحق ڈار کو یقین دہانی کرائی کہ وہ نہ صرف جاپان بلکہ دنیا بھر میں ن لیگی کارکنوں پر زور دیں گے کہ وہ زیادہ سے زیادہ زرمبادلہ قانونی طریقے سے پاکستان بھیجیں۔انہوں نے کہا کہ اوورسیز پاکستانیوں کی جانب سے سالانہ 30 سے 32 ارب ڈالر کا زرمبادلہ پاکستان بھیجا جاتا ہے اسے 40 ارب ڈالر تک پہنچائیں، تاکہ ملک کو معاشی بحران سے نکالنے میں حکومت کی مدد کرسکیں۔اس موقع پر ن لیگ پنجاب کے رہنما رانا مشہود سے بھی ن لیگ جاپان کے وفد سے ملاقات کی اور دینی اور سیاسی معاملات پر گفتگو کی۔ملاقات میں سینئر لیگی رہنما رانا شوکت، ن لیگ کویت کے چیئرمین چوہدری عرفان ناگرہ،
ن لیگ سعودی عرب کے رہنما چوہدری محمود الحق ڈوگر، ڈپٹی سیکریٹری جنرل رانا طارق محمود سمیت دیگر رہنما بھی موجود تھے،علاوہ ازیں ایک ٹویٹ میں وفاقی وزیرخزانہ ومحصولات سینیٹر محمد اسحاق ڈار نے کہاکہ مارچ میں حسابات جاریہ کے کھاتوں کا توازن خسارہ کی بجائے فاضل ہو گیا ہے۔ اپنے ایک ٹویٹ میں وزیرخزانہ نے کہا کہ حسابات جاریہ کے کھاتوں کا توازن مارچ میں 654 ملین ڈالر فاضل رہا۔فروری 2023 میں یہ 36 ملین ڈالر کے خسارہ میں تھا۔وزیرخزانہ نے کہا کہ جولائی سے مارچ تک حسابات جاریہ کے کھاتوں کا خسارہ 3.4 ارب ڈالر ریکارڈ کیا گیا جو گذشتہ مالی سال کی اسی مدت میں 13 ارب ڈالر تھا۔
