پنجاب اور خیبر پختونخوامیں بھی تعلیمی اداروں میں موسم سرما کی چھٹیوں کا اعلان

لاہور،پشاور(صباح نیوز) صوبے پنجاب اور خیبر پختونخوا میں موسم سرما کی چھٹیوں کا اعلان ہو گیا۔وزیرتعلیم پنجاب مرادراس نے تعلیمی اداروں میں موسم سرما کی چھٹیوں کا اعلان کرتے ہوئے کہا ہے کہ 23 دسمبر سے 6 جنوری تک تعلیمی اداروں میں تعطیلات ہوں گی۔

خیبرپختونخوا کے تعلیمی اداروں میں بھی  موسم سرما کی چھٹیوں کا اعلان کر دیا گیا۔خیبرپختونخوا کے تعلیمی اداروں میں موسم سرما کی چھٹیاں این سی اوسی کے مطابق ہوں گی۔ چھٹیاں3 جنوری سے12جنوری2022 تک ہوں گی۔ایلمنٹری اینڈسیکنڈری ایجوکیشن خیبرپختونخوانینوٹیفکیشن جاری کر دیا ہے جس میں کہا گیا ہے کہ میدانی علاقوں میں چھٹیاں3جنوری سے12جنوری تک ہوں گی جب کہ پہاڑی علاقوں میں چھٹیاں 24دسمبر 2021سے28 فروری 2022 تک ہوں گی۔

یاد رہے نیشنل کمانڈ اینڈ آپریشن سینٹر(این سی او سی)نے تعلیمی اداروں میں سردیوں کی چھٹیاں3 جنوری 2022 سے ہونے کا اعلان کیا ہے۔ زیادہ ویکسی نیشن تعلیمی ادارے کھلے رہنے پرہی ہوسکتی ہے کیونکہ لاکھوں طلبا نے تاحال ویکسی نیشن نہیں کرائی ہے۔این سی اوسی نے والدین سے گزارش کی ہے کہ اپنے بچوں کی فوری ویکسی نیشن کرائیں۔

یاد رہے سندھ حکومت نے تعلیمی اداروں میں موسم سرما کی چھٹیاں 20 دسمبر سے یکم جنوری تک کرنے کا اعلان کر رکھا ہے ، محکمہ تعلیم سندھ کا کہنا تھا کہ سندھ میں تعلیمی ادارے اسکول و کالجز 20 دسمبر سے یکم جنوری تک بند رہیں گے اور 3جنوری کو تعلیمی اداروں میں تدریسی سرگرمیاں بحال کردی جائیں گی