کراچی(صباح نیوز) الخدمت فاؤنڈیشن مدارس تفہیم القرآن کے تحت پورے شہر میں مدارس کے طلبہ وطالبات کے ششماہی امتحانات کا آغاز ہوگیا ،ہزاروں بچے ان امتحانات میں شریک ہیں ۔ایگزیکٹو ڈائریکٹر الخدمت کراچی راشد قریشی نے کہا ہے الخدمت مدارس تفہیم القرآن میں زیر تعلیم ہزاروں بچوں کا امتحانی عمل میں شریک ہونااساتذہ کی محنت کو ظاہر کرتا ہے۔تفہیم القرآن کے نام سے کام کرنے والے الخدمت مدارس مسلکی سوچ سے بالاتر ہوکر معاشرے میں قرآن پاک کی تعلیم کو فروغ دے رہے ہیں ۔
ان خیالات کا اظہار انہوں نے سلیمان مسجد شاہ لطیف ٹان میں الخدمت مدارس تفہیم القرآن کے تحت ہونے ششماہی امتحانات کے معائنہ کے دوران خصوصی گفتگو کرتے ہوئے کیا ۔اس موقع پرمنیجرالخدمت مدارس تفہیم القرآن حنیف اکبراور الخدمت مدارس ضلع ملیر کے سپر وائزر قاسم ضیابھی ان کے ہمراہ تھے۔ ایگزیکٹو ڈائریکٹر الخدمت راشد قریشی نے بچوں اور بچیوں کی کلاسز میں جاکر امتحانی عمل کا مشاہدہ کیا اور اساتذہ کو مختلف ہدایات بھی جاری کیں۔ اس موقع پر انہوں نے مدرسے کے اوقات میں ہونے والی لوڈ شیڈنگ بچا کے لیے متعلقہ حکام سے بات چیت اور سولر پینل کی تنصیب کے لیے متعلقہ شعبے سے بات کرنے کی بھی یقین دہانی کرائی۔
