پشاور(صباح نیوز)عدالت نے سوشل میڈیا پر اداروں کے خلاف مہم چلانے کے مقدمے میں پاکستان تحریک انصاف سوشل میڈیا کے سربراہ اکرام کھٹانہ کی ضمانت قبل از گرفتاری منظور کر لی۔
پولیس کے مطابق اکرام کھٹانہ کے خلاف ایف آئی آر شہری حسنین رضا کی درخواست پر تھانہ گلبہار میں درج کی گئی تھی۔
درج ایف آئی آر کے مطابق اکرام کھٹانہ اداروں کے خلاف پروپیگنڈا کرنے والوں میں صف اول میں شامل ہے، اکرام کھٹانہ کے خلاف کارروائی کی جائے۔
پولیس نے کہا کہ ایف آئی آر درج ہونے کے بعد اکرام کھٹانہ کے گھر پر چھاپہ مارا گیا تاہم وہ گھر پر موجود نہیں تھے، قانون کی پاسداری ہر صورت یقینی بنائے جائے گی۔
دوسری جانب پی ٹی آئی کے سوشل میڈیا ہیڈ اکرام کھٹانہ نے عدالت سے ضمانت قبل از گرفتاری حاصل کر لی، ایڈیشنل سیشن جج بخت عالم نے اکرام کھٹانہ کی ضمانت قبل از گرفتاری کی درخواست منظور کی۔
