اسلام آباد(صباح نیوز)وزیرخزانہ اسحاق ڈار نے ئی ٹی کے شعبہ کی سہولت اور آسانی کے لیے اقدامات اٹھانے کی ہدایت کرتے ہوئے کہا ہے کہ حکومت آئی ٹی کے شعبے کو اس کی حقیقی صلاحیتوں سے فائدہ اٹھانے کے لیے ترجیحی توجہ دیتی ہے۔
وزارت خزانہ کی جانب سے جاری اعلامیہ کے مطابق 2وفاقی وزیر خزانہ محمد اسحاق ڈار کی زیر صدارت وزیر اعظم کی ٹاسک فورس برائے انفارمیشن ٹیکنالوجی(آئی ٹی) اور ٹیلی کام کا اجلاس فنانس ڈویژن میں ہوا جس میں وفاقی وزیر برائے آئی ٹی اینڈ ٹیلی کام سید امین الحق ، وزیراعظم کی معاون خصوصی برائے امور نوجوانان شیزا فاطمہ خواجہ ،وزیراعظم کے معاون خصوصی برائے برائے خزانہ طارق باجوہ، گورنر اسٹیٹ بینک، سیکرٹری خزانہ، سیکرٹری آئی ٹی اینڈ ٹیلی کام ، چیئرمین ایف بی آر، چیئر مین پی ٹی اے اور دیگر اعلیٰ افسران نے شرکت کی۔
اجلاس میں آئی ٹی سیکٹر کی کم ہوتی ہوئی برآمدات اور ان میں دوبارہ اضافہ کرنے اور اس شعبہ کو ترقی کی راہ پر لانے کے اقدامات سے متعلق امور پر تبادلہ خیال کیا گیا۔
وزیر خزانہ سینیٹر محمد اسحاق ڈار نے آئی ٹی کے شعبے کی اہمیت پر زور دیتے ہوئے کہا کہ حکومت آئی ٹی کے شعبے کو اس کی حقیقی صلاحیتوں سے فائدہ اٹھانے کے لیے ترجیحی توجہ دیتی ہے۔ انہوں نے کہا کہ آئی ٹی سیکٹر میں ترقی کے بے پناہ امکانات ہیں اور یہ پاکستان کی معیشت کو مضبوط بنانے میں اہم کردار ادا کر سکتا ہے۔
وزیر خزانہ نے وزارت آئی ٹی اینڈ ٹیلی کام کی تجاویز پر غور کرتے ہوئے متعلقہ حکام کو ہدایت کی کہ وہ آئی ٹی کے شعبہ کی سہولت اور آسانی کے لیے اقدامات کریں اور اس شعبہ کی برآمدات کی حوصلہ افزائی کے لیے رکاوٹوں کو دور کریں۔
