اسلام آباد(صباح نیوز)سابق وزیر داخلہ شیخ رشید احمد نے اوورسیز پاکستانیوں کو ووٹ کا حق دینے کی درخواست سپریم کورٹ میں دائر کر دی۔شیخ رشید کی جانب سے دائر درخواست میں وفاق اور الیکشن کمیشن کو فریق بنایا گیا ۔
سابق وزیرِ داخلہ کی درخواست میں استدعا کی گئی کہ الیکشن ایکٹ کی شق 94 میں کی گئی ترمیم کو غیر آئینی قرار دیا جائے۔درخواست میں سپریم کورٹ سے استدعا کی گئی کہ حکومت کو اوورسیز پاکستانیوں کو ووٹ کا حق دلوانے کے لیے اقدامات کا حکم دیا جائے۔شیخ رشید کا درخواست میں موقف ہے کہ پوری دنیا میں 9 ملین اوورسیز پاکستانی ہیں۔
ان کا درخواست میں کہنا ہے کہ مقننہ نے اوورسیز پاکستانیوں کے ووٹ کے لیے پائلٹ پراجیکٹ کرنے کا کہا ہے، جبکہ پائلٹ پراجیکٹس معاشی یا کمرشل معاملات میں کئے جاتے ہیں۔انہوں نے درخواست میں کہا کہ آرٹیکل 218کے تحت الیکشن کمیشن کی ذمے داری ہے کہ صاف شفاف انتخابات کرائے، حکومت کی الیکشن ایکٹ میں کی گئی ترمیم آرٹیکل 218، 219اور 222کی خلاف ورزی ہے۔درخواست میں سپریم کورٹ سے استدعا کی گئی کہ الیکشن ایکٹ میں کی گئی ترمیم کالعدم قرار دی جائے۔
