جدہ (صباح نیوز)وفاقی وزیر منصوبہ بندی و ترقی احسن اقبال نے کہاہے کہ ہمیں سیاسی لانگ مارچوں کو خیر باد کہہ کر اقتصادی لانگ مارچ کرنا ہے،پاکستان کی تین اڑانیں عدم استحکام کی بدولت کریش ہو چکی ہیں۔ چوتھی اڑان کی پوری قوم کو حفاظت کرے گی، اب مزید کریش کی گنجائش نہیں ، ملک کی ترقی کے لئے قومی یکجہتی، یگانگت اور اتحاد ناگزیر ہے۔ ایک سیاستدان نے پاکستانی قوم کو دنیا میں چور ڈاکو بنا کر پیش کیا۔ ان خیالات کا اظہار وفاقی وزیر منصوبہ بندی و ترقی احسن اقبال نے جدہ میں پاکستانی بزنس کمیونٹی کی جانب سے دئیے گئے استقبالیہ سے خطاب کرتے ہوئے کیا۔
احسن اقبال نے کہاکہ اڑان پاکستان ملک کی ترقی کو پائیدار اور دیرپا بنیاد فراہم کرنے کا پروگرام ہے۔ پاکستان کی تین اڑانیں عدم استحکام کی بدولت کریش ہو چکی ہیں۔ چوتھی اڑان کی پوری قوم کو حفاظت کرے گی، اب مزید کریش کی گنجائش نہیں ہمیں سیاسی لانگ مارچوں کو خیر باد کر کے اقتصادی لانگ مارچ کرنا ہے۔ قوموں کے تعلقات کو اقتصادی رشتے ہی لازوال بنیادیں فراہم کرتے ہیں۔ پاکستان اور سعودی عرب کے درمیان تجارت روابط بڑھانے میں مقامی کمیونٹی کردار ادا کرے۔ اڑان پاکستان کے پانچ نکاتی ایجنڈے میں برآمدات کے فروغ کو مرکزی اہمیت حاصل ہے۔ ہماری معاشی خودمختاری کا انحصار معیشت کے ڈالر کمانے کی صلاحیت پر ہے۔
وزیراعظم شہباز شریف نے معیشت کو ڈھلوان سے اڑان پر موڑ دیا ہے، ہر پاکستانی کا فرض ہے کہ اپنی پوری صلاحیتیں معاشی اڑان کی کامیابی کے لئے وقف کردے۔ انہوں نے کہا کہ بیرون ملک مقیم پاکستانی قوم کا بہترین سرمایہ ہیں ۔دنیا ٹیکنالوجی کی بدولت تیزی سے بدل رہی ہے، ہمیں بھی خود کو بدلنا ہے تحقیق اور ٹیکنالوجی کے شعبوں میں مسلمان پیچھے رہ گئے ہیں جس کی سزا مل رہی ہے۔ اڑان پاکستان ملک کی معیشت کو جدید ٹیکنالوجی سے جوڑے گا۔ ملک کی ترقی کے لئے قومی یکجہتی، یگانگت اور اتحاد ناگزیر ہے۔ ایک سیاستدان نے پاکستانی قوم کو دنیا میں چور ڈاکو بنا کر پیش کیا ۔
انہوں نے کہاکہ پاکستانی قوم کی اصل پہچان اس کی محنت اور ذہانت ہے، ہمیں محنت، ذہانت ،دیانت اور اعلی معیار سے پاکستانی برانڈ دنیا میں منوانا ہے۔ ان کا کہنا تھا کہ پاکستان کو خدا نے کھربوں ڈالر کے معدنیات سے نوازا ہے ۔حکومت نے بلوچستان میں معدنیات کی ترقی کے منصوبے شروع کئے ہیں۔ اس عمل سے بلوچستان کی ترقی کے دشمنوں کی نیندیں اڑ گئی ہیں ۔ بلوچستان ترقی کرے گا اور پاکستان کا خوشحال ترین صوبہ بنے گا۔ ہمارے دیگر ممالک سے پیچھے رہنے کی وجہ سیاسی بے یقینی اور پالیسیوں کا عدم تسلسل ہے ہمیں اپنی غلطیوں سے سیکھ کر ملک میں دوبارہ عدم استحکام پیدا نہیں ہونے دینا ۔
انہوں نے کہا کہ حکومت نے دو لاکھ نوجوانوں کی سالانہ آئی ٹی میں تربیت کا پروگرام شروع کیا ہے۔ ایک ہزار زرعی ماہرین کو جدید زراعت کی تربیت کیلئے چین بھیجا جا رہا ہے ہم 2035ء تک پاکستان کو ایک کھرب ڈالر کی معیشت بنانے کا عزم رکھتے ہیں۔ پاکستان ہماری پہچان اور وطن ہے، اس پہ آنچ نہیں آنے دیں گے۔
