کوئٹہ(صباح نیوز)وزیراعلی بلوچستان کی زیرصدارت اعلی سطی اجلاس میں فورسز کے آپریشنز کو مزید وسعت دینے پر اتفاق کرلیاگیا،اجلاس میں تمام سیکیورٹی اداروں کی باہمی رابطہ کاری سے اقدامات کو بار آور بنانے کی ہدایت بھی کی گئی ،سول آرمڈ فورسز کی استعداد کار کو مزید بہتر بنانے کے لیے اہم فیصلے بھی لیے گئے۔
تفصیلات کے مطابق وزیراعلی بلوچستان سرفراز بگٹی کی زیر صدارت اجلاس میں چیف سیکرٹری بلوچستان، ایڈیشنل چیف سیکریٹری داخلہ اور انسپکٹر جنرل آف پولیس (آئی جی پی)بلوچستان سمیت اعلی حکام شریک ہوئے۔اجلاس میں عید پر سیکیورٹی پلان، قومی شاہراہوں کی صورتحال اور صوبے مین امن و امان پر تبادلہ خیال کیا گیا، حکام کی جانب سے اجلاس کو صوبے کی مجموعی صورتحال پر تفصیلی بریفنگ دی گئی، اجلاس میں قلات میں سیکورٹی فورسز کے کامیاب آپریشن کو سراہا گیا۔
دوران اجلاس دہشتگردوں کیخلاف سیکیورٹی فورسز کے آپریشنز کو مزید وسعت دینے پر اتفاق کیا گیا۔سول آرمڈ فورسز کی استعداد کار کو مزید بہتر بنانے کے لیے اہم فیصلے کیے گئے۔ وزیر اعلی بلوچستان نے حکام کو امن کی بحالی کے لیے اقدامات کو موثر بنانے اور تمام سیکیورٹی اداروں کی باہمی رابطہ کاری سے اقدامات کو بار آور بنانے کی ہدایت بھی کی۔
