اسلام آباد(صباح نیوز)پاکستان کے پاور سیکٹر کو ایک جامع انرجی پلان کی ضرورت ہے جو قلیل مدتی حل سے آگے بڑھ کر آزاد بجلی پیدا کرنے والے اداروں (آئی پی پیز) کے معاہدوں پر منظم، شفاف، اور جامع نظرثانی کرے۔ نیز، آئی پی پیز کے ساتھ معاہدوں میں ٹیرف کے ڈھانچے کا مکمل جائزہ لینا بھی ضروری ہے تاکہ بجلی کی قیمتوں کو معقول اور دستیاب بنایا جا سکے، اور سرمایہ کاروں کے اعتماد کے ساتھ متوازن کیا جا سکے۔ ساتھ ہی، طویل مدتی توانائی کی حفاظت اور مسابقت کے لیے حکمرانی میں ناکامیوں کو بھی دور کرنا ہوگا۔ یہ بات انسٹیٹیوٹ آف پالیسی اسٹڈیز (آئی پی ایس) اسلام آباد کے زیر اہتمام ویبنار ‘آئی پی پی معاہدوں میں اصلاحات: ٹیرف اور سرکلر قرضے میں کمی’ کے دوران زیر بحث آئی۔
اس نشست کی صدارت سابق وفاقی سیکرٹری، وزارت پانی و بجلی مرزا حامد حسن نے کی، جبکہ دیگر مقررین میں چیئرمین آئی پی ایس خالد رحمن ، نیپرا کے ڈائیریکٹر جنرل لائسنسنگ امتیاز حسین بلوچ، ایس ڈی پی آئی کے ریسرچ فیلو احد نذیر، ایف پی سی سی آئی کی ایس ڈی جی کمیٹی کے ممبر ابو بکر اسماعیل، سسٹین ایبیلیٹی ایکسپرٹ اسد محمود، اور پبلک پالیسی ایکسپرٹ ڈاکٹر اطہر منصور شامل تھے۔ احد نذیر نے بجلی کی دستیابی اور اس کی قیمتوں کے تضاد پر روشنی ڈالتے ہوئے کہا کہ بجلی کی دستیابی کو یقینی بنانے کی کوششوں نے ٹیرف میں اضافہ کر دیا ہے، جس سے برآمدات غیر مسابقتی ہو گئی ہیں۔ سرکلر قرضہ 2.7 کھرب روپے تک پہنچ چکا ہے جو زیادہ تر صلاحیتی ادائیگیوں اور ڈالر انڈیکسیشن کی وجہ سے ہے نہ کہ صرف معاہدے کے ڈھانچے کی وجہ سے۔ انہوں نے خبردار کیا کہ اکتوبر 2024 میں کچھ آئی پی پی معاہدوں کے خاتمے سے سرمایہ کاروں کے اعتماد پر معمولی اثر پڑ سکتا ہے، لیکن وسیع پیمانے پر معاہدوں کی نظرثانی شفاف اور پیش گوئی کرنے کے قابل ہونی چاہیے تاکہ سرمایہ کاری کو مایوس ہونے سے بچایا جا سکے۔
اس پر تبصرہ کرتے ہوئے امتیاز بلوچ نے کہا کہ پاکستان کے توانائی کے شعبے کے مسائل حکومتی ناکامیوں اور توانائی کے غیر متوازن مکس سے ہیں۔ انہوں نے زور دیا کہ ٹیرف کے نمونوں کا خاص طور پر تقسیم کے شعبے پر تفصیل سے جائزہ لیا جانا چاہیے۔ تقسیم کی کمپنیوں کو انفراسٹرکچر، حکومتی انتظام اور ٹیکنالوجی میں اہم سرمایہ کاری کی ضرورت ہے تاکہ کارکردگی میں بہتری لائی جا سکے اور نقصانات کو کم کیا جا سکے۔ انہوں نے کہا کہ مقامی ایندھن کے ذرائع کو ترجیح دی جانی چاہیے تاکہ مہنگی درآمدات پر انحصار کم ہو سکے، توانائی کی سیکیورٹی اور لاگت کی مثریت میں اضافہ ہو سکے۔ ابوبکر اسماعیل نے ٹیرف ڈھانچے اور منافع کے مارجن کا تکنیکی جائزہ لینے پر زور دیا تاکہ منصفانہ قیمتیں اور صنعت کی مسابقت کو یقینی بنایا جا سکے۔ چونکہ بجلی صنعتی ترقی میں ریڑھ کی ہڈی کی حیثیت رکھتی ہے، اس لیے توانائی کی بے قابو قیمت پاکستان کی برآمدی صلاحیت کو نقصان پہنچاتی ہے۔ انہوں نے کہا کہ ایک جھٹکے سے مسئلہ حل کرنے کے اقدامات سے بحران ختم نہیں ہوگا۔
اس کے بجائے، پاور سیکٹر میں لچک پیدا کرنے کے لیے ایک منظم تقسیم شدہ وسائل کی حکمت عملی تیار کی جانی چاہیے۔ اسد محمود نے کہا کہ ایک اہم مسئلہ کیپیسیٹی ٹریپ کا ہے، جہاں صلاحیت کی ادائیگیاں 2016 میں 3 روپے فی یونٹ سے بڑھ کر 2025 میں 18 روپے فی یونٹ تک پہنچ چکی ہیں، جو کرنسی کی قیمت میں کمی اور پالیسی کے ناقص فیصلوں کی وجہ سے ہیں۔ ا نہوں نے خبردار کیا کہ مسابقت کو توانائی کے ماڈل کی رہنمائی کرنی چاہیے تاکہ کسی بیرونی دباو میں آئے بغیر گورننس اور منصوبہ بندی کو بہتر بنایا جا سکے۔ اس پر تبصرہ کرتے ہوئے اطہر منصور نے کہا کہ پچھلی پالیسی سازی فوری ردعمل، بدعنوانی اور اسٹیک ہولڈرز کی شمولیت کی کمی کی وجہ سے متاثر ہوئی ہے۔ انہوں نے کہا کہ ایک شفاف اور جامع نقطہ نظر ضروری ہے تاکہ ماضی کی سرمایہ کاری کو محفوظ رکھا جا سکے اور اصلاحات کو نافذ کیا جا سکے۔
انہوں نے کہا کہ آئی پی پی معاہدوں میں اسٹریٹجک، وقت کی پابند ترامیم کی ضرورت ہے تاکہ غیر یقینی صورتحال اور سرمایہ کاروں کے عدم اعتماد سے بچا جا سکے، اور صارفین اور صنعتوں کے لیے ریلیف کو ترجیح دی جائے۔ اس سلسلے میں مرزا حامد نے اس بات پر زور دیا کہ انفرادی ریلیف اقدامات کی بجائے اصلاحات کو جامع ہونا چاہیے، پالیسی میں تسلسل، تقسیم کے بنیادی ڈھانچے میں سرمایہ کاری، اور سرمایہ کاری کے لیے سازگار پاور ماڈل کے ساتھ ایندھن کے متنوع مکس اور مقامی توانائی کے ذرائع پر زیادہ انحصار کرنا چاہیے۔ اپنے اختتامی کلمات میں خالد رحمن نے کہا کہ آئی پی پی معاہدوں کی نظرثانی کے لیے عمومی اقدامات کے بجائے ایک واضح حکمت عملی کی ضرورت ہے ۔ ہر معاہدے کا اس کے فوائد کے مطابق جائزہ لیا جانا چاہیے، تاکہ سرمایہ کاروں اور صارفین کے لیے انصاف کو یقنی بنایا جا سکے۔ انہوں نے مزید کہا کہ اس عمل کو وقت کی پابند بنایا جانا چاہیے، اور کسی غیر یقینی صورتحال کے نہ ختم ہونے والے سلسلے کے بجائے ایک واضح روڈ میپ کے ساتھ اختتام پذیر ہونا چاہیے
