اسلام آباد(صباح نیوز)وفاقی وزیر داخلہ محسن نقوی نے کہاہے کہ وفاق اور صوبائی حکومتیںافغان سیٹیزن کارڈ ہولڈرز کی واپسی پر عملدرآمد کے حوالے مسلسل رابطہ ہیں،سیٹیزن کارڈ ہولڈرز کو 31 مارچ تک رضاکارانہ طور پر پاکستان چھوڑنے کی ڈیڈ لائن دی گئی ہے۔واپسی کے عمل کے دوران غیر ملکیوں سے اچھا برتاؤ کیا جائے ۔
وفاقی وزیر داخلہ محسن نقوی کی زیر صدارت افغان سیٹیزن کارڈ ہولڈرز کی واپسی کے حوالے سے اعلی سطح کا اجلاس ہوا۔اجلاس میں وزیر مملکت برائے داخلہ طلال چوہدری،وفاقی سیکرٹری داخلہ، سیکرٹری کشمیر افیرز و سیفران، تمام صوبوں کے چیف سیکرٹریز، آئی جیز، ڈی جی ایف آئی اے، آئی جی اسلام آباد پولیس، ڈی سی اسلام آباد، کوآرڈینیٹر نیشنل ایکشن پلان، وزارت خارجہ، وزارت قانون اور سکیورٹی اداروں کے نمائندوں نے شرکت کی ۔وزیر داخلہ محسن نقوی نے افغان سیٹیزن کارڈ ہولڈرز کی وطن واپسی کے سلسلے میں لئے گئے اقدامات کا جائزہ لیا غیر قانونی غیر ملکیوں کی وطن واپسی کا پروگرام(IFRP) 1 نومبر 2023 سے جاری ہے۔
اس پروگرام کے دوسرے مرحلے میں افغان سیٹیزن کارڈ ہولڈرز کو 31 مارچ تک رضاکارانہ طور پر پاکستان چھوڑنے کی ڈیڈ لائن دی گئی ہے۔ وفاق اور صوبائی حکومتوں کے مابین افغان سیٹیزن کارڈ ہولڈرز کی واپسی پر عملدرآمد کے حوالے مسلسل رابطہ ہے ۔ واپسی کے عمل میں صوبائی حکومتوں کو وفاق کی جانب سے ہر ممکن تعاون فراہم کیا جائے گا۔ وزیراعلی کے پی کے کی تجاویز پر کمیٹی قائم کردی گئی۔ وزیر مملکت طلال چوہدری صوبوں کا دورہ کریں گے تاکہ واپسی کے عمل میں پیش آنے والے مسائل کا ازالہ کیا جاسکے۔
وزیر داخلہ نے واپسی کے عمل کے دوران غیر ملکیوں سے اچھے برتا ؤکی ہدایت کی۔چیف سیکرٹریز اور آئی جیز نے افغان سیٹیزن کارڈ ہولڈرز کی واپسی کے حوالے سے لئے گئے اقدامات کے متعلق وزیر داخلہ کو آگاہ کرتے ہوئے بتایاکہ افغان سیٹیزن کارڈ ہولڈرز کی واپسی کے ضمن میں تمام تیاریاں مکمل کی جا چکی ہیں۔ واپسی کے سلسلے میں گھر گھر جا کر افغان سیٹیزن کارڈ ہولڈرز کو آگاہ کیا جا رہا ہے۔افغان سیٹیزن کارڈ ہولڈرز کی میپنگ پر کام مکمل کی جا چکا ہے۔ واپس جانے والوں کیلیے ہولڈنگ سنٹرز، خوراک،صحت کی دیکھ بھال کے انتظامات بھی کئے جا چکے ہیں۔
