اسلام آباد(صباح نیوز)سربراہ پاک فضائیہ ایئر چیف مارشل ظہیر احمد بابر سدھو سے آذربائیجان کے اعلی سطح کے وفد نے ملاقات کی ہے۔ترجمان پاک فضائیہ کے مطابق آذربائیجان کے نائب وزیر دفاع جنرل عقیل قربانوف کی قیادت میں لیفٹننٹ جنرل نمیگ اسلام زادے اور دیگر اعلی حکام پر مشتمل وفد نے ایئر چیف مارشل ظہیر احمد بابر سدھو سے ملاقات کی۔ترجمان پاک فضائیہ کا کہنا ہے کہ چیف آف دی ایئر اسٹاف نے پاکستان ایئر فورس کی حالیہ کامیابیوں کو اجاگر کیا اور ایئر چیف نے دوطرفہ تعلقات خاص طور پر آپریشنل اور تربیتی شعبوں میں تعاون بڑھانے کے عزم کا اعادہ کیا۔
ترجمان پاک فضائیہ کا کہنا تھا کہ ایئرچیف نے دو طرفہ تربیتی تعاون کی اہمیت کو بھی اجاگر کیا جب کہ آذری ایئر اور گرانڈ کریو اس وقت پاک فضائیہ کی آپریشنل بیس پر تربیت حاصل کر رہا ہے۔ترجمان پاک فضائیہ نے بتایا کہ پاکستان میں آذری فضائیہ کا تربیتی پروگرام مقررہ شیڈول کے مطابق چل رہا ہے، آذری عملے کا تربیتی کورس 50 فیصد سے زیادہ مکمل ہوچکا ہے۔ترجمان پاک فضائیہ کے مطابق آذربائیجان کے اعلی سطح دفاعی وفد کا دورہ دونوں ممالک کی فوجی شراکت داری کو مزید تقویت دینے کے عزم کی نشاندہی کرتا ہے
