پیرس ،لندن(صباح نیوز) سربراہانِ مملکت کی جانب سے امریکی صدارتی انتخابات میں کامیابی پر ڈونلڈ ٹرمپ کو مبارکباد دی ہے ۔غیرملکی خبررساں ادارے کے مطابق امریکی صدارتی انتخابات میں ریپبلکن امیدوار ڈونلڈ ٹرمپ کامیاب ہونے کے بعد امریکہ کے 47 ویں صدر منتخب ہوئے ہیں، ڈونلڈ ٹرمپ دوسری مرتبہ عہدہ صدرارت پر فائز ہو رہے ہیں۔
نومنتخب امریکی صدر کو دنیا بھر سے سربراہانِ مملکت کی جانب سے مبارک باد کے پیغامات موصول ہو رہے ۔فرانسیسی صدر ایمانویل میکرون نے ٹرمپ کو امریکی صدر منتخب ہونے پر مبارک باد دیتے ہوئے ماضی کی طرح ایک بار پھر 4 سال تک مل کر کام کرنے کا عزم ظاہر کیا ہے اور کہا ہے کہ احترام اور عزائم کے ساتھ مزید امن اور خوش حالی کے لیے ایک بار پھر ساتھ کام کرنے کے لیے تیار ہیں۔
برطانوی وزیرِ اعظم کیئر اسٹارمر نے بھی ٹرمپ کو صدر منتخب ہونے پر مبارک باد پیش کی ہے اور کہا ہے کہ ٹرمپ کے ساتھ کام کرنے کا منتظر ہوں، امریکا و برطانیہ کے تعلقات کو فروغ دینے کا سلسلہ جاری رہے گا۔بھارتی وزیرِ اعظم نریندر مودی نے سوشل میڈیا پر شیئر کردہ پیغام میں ٹرمپ کو مبارک باد دیتے ہوئے لکھا ہے کہ بھارت امریکہ تعلقات مضبوط بنانے، جامع عالمی اور سٹرٹیجک شراکت داری کا منتظر ہوں۔ا نہوںنے کہا کہ آئیے! مل کر اپنے لوگوں کی بہتری اور عالمی امن، استحکام اور خوش حالی کو فروغ دینے کے لیے کام کریں۔ اسرائیلی وزیرِ اعظم نیتن یاہو نے ٹرمپ کی جیت کو تاریخی قرار دیتے ہوئے ایک بار پھر صدر منتخب ہونے پر مبارک باد پیش کی ہے۔
انہوں نے سماجی رابطے کی ویب سائٹ ایکس پر پیغام جاری کرتے ہوئے لکھا ہے کہ ڈونلڈ اور میلانیا ٹرمپ کو تاریخ کی سب سے بڑی واپسی مبارک ہو، وائٹ ہائوس میں آپ کی تاریخی واپسی امریکا کے لئے ایک نئی شروعات اور اسرائیل اور امریکہ کے درمیان عظیم اتحاد کے لئے مضبوط عزم کی نشاندہی کرتی ہے، یہ ایک عظیم فتح ہے۔۔علاوہ ازیں اٹلی کے وزیرِ اعظم، یوکرین کے صدر، چیک ری پبلک کے وزیرِ اعظم سمیت دیگر ممالک کے سربراہان اور نیٹواتحاد بھی ٹرمپ کو ایک بار پھر امریکی صدر منتخب ہونے پر مبارک باد پیش کی اور ایک ساتھ مل کر کام کرنے کا اعادہ کیا۔
