کراچی(صباح نیوز)صوبائی وزیر سندھ شرجیل انعام میمن نے کہا ہے کہ انشا اللہ پاکستان تمام مسائل پر قابو پالے گا، ماضی کے تجربے تلخ ہیں، مگر اب ایسا کچھ نہیں ہونے والا، یہ سسٹم اور حکومت چلے گی، کسی پریشانی کی ضرورت نہیں،کچھ لوگ مایوسی پھیلا رہے ہیں، عوام کسی قسم کی سازش کو کامیاب نہیں ہونے دیں گے۔
کراچی میں پیپلز بس سروس نے نئے روٹ کی افتتاحی تقریب سے خطاب اور میڈیا سے گفتگو کرتے ہوئے شرجیل میمن نے کہا کہ عوام اور سرمایہ کاروں کو پریشان ہونے کی کوئی ضرورت نہیں ہے۔ ملک میں کچھ نہیں ہونے جارہا، عوام کسی قسم کی سازش کو کامیاب نہیں ہونے دیں گے۔ ماضی کے مقابلے میں اسٹیبلشمنٹ کا کردار بہتر نظر آرہا ہے ، کچھ لوگ مایوسی پھیلا رہے ہیں لیکن کوئی مایوسی کی بات نہیں، لوگ مختلف انداز میں منفی باتیں پھیلاتے ہیں، مگر کچھ برا ہونے نہیں جارہا، یہ سسٹم اور حکومت چلے گی، ملک میں کچھ نہیں ہونے والا۔ معاشی چیلنجز میں بھی جلد بہتری آنے والی ہے۔
شرجیل انعام میمن نے کہا کہ سندھ حکومت کی کوشش ہے کہ عوام کو ریلیف ملے، ماڑی پور سے ٹاور تک ایک نئے بس روٹ کا آغاز کر رہے ہیں، سندھ حکومت کی توجہ عوام کو ہر شعبے میں سہولت دینے پر ہے، ملک میں چیلنجز ہیں، مہنگا ئی کا طوفان بھی ہے، بجلی کی قیمتیں اور بجلی کی لوڈ شیڈنگ ایک چیلنج ہے، پالیسی ساز ن لیگ ہے مگر پاکستانی کے طور پر ہم سب کی ذمہ داری ہیں۔صوبائی وزیر نے کہا کہ حالات کٹھن ہیں، مہنگا ئی ہے، چیلنجز ہیں، یہاں رائے بنائی جاتی ہے کہ حکومت کام نہیں کررہی لیکن آپ کو نظر آرہا ہے کہ حکومت سندھ کام کررہی ہے۔انہوں نے سپریم کورٹ کے فیصلے کے حوالے ایک سوال کا جواب دیتے ہوئے کہا کہ سپریم کورٹ کے فیصلے میں وہ ریلیف دیئے گئے جو مانگے بھی نہیں گئے، الیکشن کمیشن کے قانون میں ہے کہ کونسی پارٹی الیکشن لڑنے کی اہلیت رکھتی ہے اور کونسی نہیں۔ انہوں نے کہا کہ الیکشن کمیشن کا قانون کہتا ہے کہ غیرملکی فنڈنگ لینے والی جماعت اہل نہیں، پی ٹی آئی نے اپنے فارن فنڈنگ کے اکاؤنٹس چھپائے، شارع فیصل پر بسوں کو کس نے آگ لگائی، یہ نہیں ہوسکتا کہ کوئی مشہور ہوں تو اس پر سو خون معاف ہیں، دنیا میں کہیں ہوتا ہے کہ آپ قانون سے بالاتر ہوں؟۔
شرجیل میمن نے فرینکفرٹ واقعہ کی شدید مذمت کرتے ہوئے کہا کہ ہر دور میں پاکستان نے افغانستان پر احسان کئے ہیں، جو بھی غیر قانونی طور پر یہاں رہ رہا ہے اس کے خلاف کارروائی ہوگی۔انہوںنے کہا کہ امریکہ کے الیکشن میں کافی چیزیں واضح ہیں، امریکہ کے شخص اور یہاں جیل میں موجود شخص کی سوچ ایک ہی ہے، عوام کافی جگہ غلط سوچ رکھتے ہیں لیکن عوام ان افراد کو لائیں جو جوڑنے کی بات کریں، تفریق کی نہیں۔
