لاہور(صباح نیوز)وزیراعلیٰ پنجاب مریم نواز نے ماں کے عالمی دن کے موقع پر ماں کی عظمت کو سلام پیش کیا ہے۔
ماں کے عالمی دن پر اپنے خصوصی پیغام میں وزیراعلیٰ پنجاب مریم نواز کا کہنا تھا کہ “ماواں ٹھنڈیاں چھاواں” سراپا شفقت و عنایت ماں کی عظمت کو سلام، مدر ڈے غزہ اور کشمیر کی پرعزم اور حوصلہ مند ماں کے نام۔ مریم نواز نے کہا کہ زندگی کی چلچلاتی دھوپ میں ماں ٹھنڈی چھاں کی مانند راحت وسکون ہے، اللہ تعالی نے اپنی محبت کو ماں کی محبت سے تشبیہ دے کر درجہ بلند کر دیا، ماں سچے جذبے اور رشتے کا نام ہے، مائیں خاندان کا سنگ بنیاد اور معاشرت کا ستون ہیں۔
وزیراعلیٰ پنجاب کا کہنا تھا کہ مدر ڈے ماں کی غیر معمولی محبت اور قربانیوں کو تسلیم کرنے کا دن ہے، مدر ڈے پر اور ہر روز اپنی عظیم ماں کی کمی محسوس کرتی ہوں، ہمیشہ والدہ محترمہ کلثوم نواز کی محبتوں کی شکر گزار رہوں گی۔ انہوں نے مزید کہا کہ والدہ محترمہ کی دعاؤں کی بدولت آج اس منصب پر ہوں، ماں کی خدمت کو شعار بنانے والے دنیا و آخرت میں سرخرو ہوتے ہیں۔
