پنجاب میں 21 نئی یونیورسٹیوں کا قیام عمل میں لایا جارہا ہے، فردوس عاشق اعوان


لاہور (صباح نیوز)وزیر اعلیٰ پنجاب کی معاون خصوصی برائے اطلاعات ونشریات ڈاکٹر فردوس عاشق اعوان نے کہا ہے کہ پنجاب میں 21 نئی یونیورسٹیوں کا قیام عمل میں لایا جارہا ہے۔سات یونیورسٹیاں انتہائی پسماندہ علاقوں میں بنائی جارہی ہیں جس سے پسماندہ علاقے بھی علم کی روشنی سے منور ہونگے۔

پنجاب کا چپہ چپہ ترقی و خوشحالی کا منظر پیش کرے گا۔پی ٹی آئی حکومت پنجاب کے ہر ضلع میں یونیورسٹی بنانے جا رہی ہے۔ ان خیالات کااظہار فردوس عاشق اعوان نے منگل کے روز ٹوئٹر پر جاری اپنے بیان میں کیا۔

فردوس عاشق اعوان کا کہنا تھا کہ شوباز حکومت نے قوم کو زیور تعلیم سے محروم رکھنے کیلئے شعبہ تعلیم کیساتھ کھلواڑ کیا۔پہلی مرتبہ وزیراعظم عمران خان کے وژن اور وزیراعلی پنجاب سردار عثمان بزدار کی قیادت میں پنجاب حکومت قوم کو اعلی تعلیم سے آراستہ کرنے کیلئے پنجاب بھر میں یونیورسٹیوں کا جال بچھا رہی ہے۔