سینیٹ،ضمنی انتخابات نے عمران خان کے ہر دعوے کو بے نقاب کر دیا،لیاقت بلوچ


لاہور : جماعت اسلامی کے نائب امیر ، سیاسی انتخابی قومی امور قائمہ کمیٹی کے صدر لیاقت بلوچ نے کہا ہے کہ سینیٹ اور ضمنی  انتخابات نے عمران خان کے ہر تقریری دعوے کو بے نقاب کر دیا۔انہوں نے ضلع اٹک کا ایک روزہ دورہ میں شینکہ حضرو ، اٹک شہر ، ناڑہ ، پنڈ سلطانی ، جنڈ میں ورکرز کنونشن ، تعزیتی ریفرنس اور یوتھ تنظیموں کے کنونشن سے خطاب کرتے ہوئے کہا کہ پاکستان میں ترقی ، استحکام اور جمہوری پارلیمانی نظام کی تمام بنیادیں موجود ہیں ۔

اللہ تعالیٰ نے آزادی اور قدرتی وسائل اور انسانی صلاحیتوں سے مالا مال کیا ہے لیکن فوجی آمریتوں اور ناکام نالائق سیاسی جمہوری قیادت نے ملک کے گھمبیر بحرانوں سے دوچار کر دیا ہے ۔ غربت بے روزگاری کرپشن لا قانونیت اور آئین سے انحراف قومی وجود کو دیمک کی طرح چاٹ رہا ہے ۔ ملک بھر میں محب دین محب وطن با صلاحیت لوگوں کو ہر طرح کے تحفظات اور ذہنی غلامی سے نجات پانے کے لیے تعمیر نو اور سماجی انقلاب برپا کرنے کے لیے متحد ہونا ہو گا ۔

جماعت اسلامی ہر با صلاحیت کارآمد اور محب وطن فرد کا مشترکہ پلیٹ فارم ہے عوام جماعت اسلامی کا ساتھ دیں ملک کو بحرانوں سے نجات دلائیں گے ۔ لیاقت بلوچ نے صحافیوں کے سوالات کے جواب میں کہا کہ جماعت اسلامی کا نا اہل ناکام حکومت اور تضادات کی شکار اپوزیشن کے مقابلہ میں اسلام کی حکمرانی کشمیر کی آزادی عوامی مسائل کے حل اور اسلام کے معاشی نظام کے قیام کا ایجنڈا ہے ۔

مزید پڑھیں: ضمنی انتخابات میں حکومتی مداخلت نے انتخابی نظام کو بے نقاب کر دیا ،لیاقت بلوچ

سینیٹ اور ضمنی  انتخابات نے عمران خان کے ہر تقریری دعوے کو بے نقاب کر دیا ہے ۔ ماضی کی حکومتوں کی طرح عمران سرکار بھی ریاستی طاقت سے عوام کے حق ووٹ کو چوری کر رہی ہے۔ شفاف اور غیر جانبدارانہ انتخابات کے لیے تمام سیاسی جمہوری قوتوں کو قومی ڈائیلاگ کے ذریعے انتخابی اصلاحات کا مضبوط نظام لانا ہو گا ۔ ووٹ کو عزت ووٹ کو چوری ہونے سے بچانے کے لئے سیاسی جمہوری جماعتوں کو اسٹیبلشمنٹ سے خیرات نہیں ملے گی ۔ لیاقت بلوچ نے اٹک ضلع میں مرکزی اور اندرونی سڑکوں کی تباہ حالی پر کہا کہ پنجاب اور وفاقی حکومتیں شرم کریں عوام کو سہولت دیں ۔