اسلام آباد(صباح نیوز)اسلام آباد میڈیکل اینڈ ڈینٹل کالج نے اپنے میڈیکل، ڈینٹل، نرسنگ اور الائیڈ ہیلتھ سائنسز کے فارغ التحصیل طلبہ کے لیے کانووکیشن کا انعقاد کیا۔ سینکڑوں ایم بی بی ایس، بی ڈی ایس، ڈی پی ٹی، ایم ایل ٹی اور نرسنگ گریجویٹس نے اپنے والدین اور خاندان کے افراد کے ساتھ اس تقریب میں شرکت کی۔لیفٹیننٹ جنرل نگار جوہر خان، سابق سرجن جنرل/ڈی جی ایم ایس (IS) نے تقریب میں بطور مہمان خصوصی شرکت کی۔
دیگر قابل ذکر افراد میں شہید ذوالفقار علی بھٹو میڈیکل یونیورسٹی کے رجسٹرار ڈاکٹر مقبول حسین بھی شامل تھے۔ کانووکیشن میں علمی، دانشور، کارپوریٹ اور سماجی شخصیات اور میڈیا کے نمائندوں نے بڑی تعداد میں شرکت کی۔آئی ایم ڈی سی کے چیئرمین آئی ایم ڈی سی ڈاکٹر غلام اکبر خان نیازی، منیجنگ ڈائریکٹر یاسر خان نیازی اور پرنسپل پروفیسر ڈاکٹر سید عرفان احمد نے مہمانوں کو خوش آمدید کہا اور تمام گریجویٹس اور ان کے اہل خانہ کے ساتھ ساتھ آئی ایم ڈی سی کی فیکلٹی اورانتظامیہ کو مبارکباد دی۔
لیفٹیننٹ جنرل(ریٹائرڈ) نگار جوہر خان نے بہترین گریجویٹس کو میڈلز پیش کیے اور آئی ایم ڈی سی کی اعلی معیار کی طبی تعلیم فراہم کرنے کی کوششوں کو سراہتے ہوئے گریجویٹس کو طب کے مقدس شعبے میں مشق کرتے ہوئے بہترین پیشہ ورانہ اخلاقیات کو برقرار رکھنے کا مشورہ دیا۔
گریجویٹس اور ان کے والدین نے خوشی کا اظہار کیا اور IMDC انتظامیہ کا شکریہ ادا کیا کہ انہوں نے انہیں میڈلز اور ڈگریاں دینے کے لیے اتنے بہترین کانووکیشن کا انعقاد کیا۔IMDC انتظامیہ نے اس موقع پر اظہار کیا کہ کالج ہمیشہ “انسانیت کی خدمت کے لیے بنیاد فراہم کرنے” کے اپنے نصب العین پر عمل پیرا ہے، اور یہ طبی تعلیم اور صحت کی دیکھ بھال کے شعبے میں نمایاں خدمات انجام دیتا رہے گا۔۔
