لاہور(صباح نیوز)وزیراعظم کے معاون خصوصی عطا اللہ تارڑ نے کہا ہے کہ پنجاب حکومت زیادہ دیر چلنے والی نہیں،جب بھی ق لیگ کی حکومت آتی ہے آٹے کی قلت پیدا ہوجاتی ہے،صوبائی حکومت کا سارا فوکس صرف گجرات پر ہے۔
لاہور کی سیشن کورٹ کے باہر میڈیا سے گفتگو کرتے ہوئے مسلم لیگ ن کے رہنما اور وزیراعظم کے معاون خصوصی عطا اللہ تارڑ نے کہا کہ پنجاب میں لوٹ مار کا بازار گرم ہے، صوبائی حکومت کا سارا فوکس صرف گجرات اور اپنے لوگوں کو نوکریاں دلوانے پر ہے، آٹے کی قلت اور عوامی مسائل کے حل کیلئے کوئی نہیں سوچ رہا، پنجاب حکومت زیادہ دیر چلنے والی نہیں ہے۔
رہنما مسلم لیگ ن عطا اللہ تارڑ نے کہا کہ ملک میں قدرتی آفت کی وجہ سے کروڑوں افراد بے گھر ہوچکے ہیں، امدادی اور بحالی کے لئے اقدامات کررہے ہیں، وزیراعلیٰ پنجاب اور ان کے صاحبزادے کہیں نظر نہیں آ رہے، خیبر پختونخوا، پنجاب،آزاد کشمیر اور گلگت بلتستان میں حکومت نظر نہیں آرہی ہے،ایک سیاسی جماعت کروڑوں روپے خرچ کر کے جلسے کر رہی ہے۔
معاون خصوصی نے کہا کہ اٹھارہویں ترمیم کے بعد آٹے اور ادویات کی قلت کی ذمہ داری وفاقی حکومت کو مت دیں۔ انہوں نے الزام لگایا کہ آٹے کے ذخیرہ اندوزوں کی پشت پناہی کی جارہی ہے، جب بھی ق لیگ کی حکومت آتی ہے آٹے کی قلت پیدا ہوجاتی ہے، وزیر اعلیٰ اور ان کے صاحبزادے نے عثمان بزدار سمیت سارے ریکارڈ توڑ دئیے ہیں، ایک کلرک کو 22 سکیل کا سیکرٹری بنا دیا جائے تو کیا ہوتا ہے، چیف سیکرٹری پنجاب نے کام کرنے سے انکار کردیا، یہ حکومت چلنے والی نہیں۔
عطا تارڑ نے دعویٰ کیا کہ میری ضمانت اس لئے ہوئی ہے کہ میرے خلاف کوئی ثبوت سامنے نہیں آیا، جو جلسوں میں بڑے بڑے تقریر کرتے ہیں وہ بتائیں فرح گوگی کو کب واپس لارہے ہیں؟۔رہنما مسلم لیگ ن نے کہا کہ پرویز الٰہی حکومت کا خاتمہ کرکے رہیں گے، پی ٹی آئی کرپشن کا احتساب ہوگا۔
عطا تارڑ نے کہا کہ مجھ پر جھوٹا مقدمہ بنایا گیا تھا، وزیر داخلہ پنجاب ہاشم ڈوگر کو نہ وزارت کا پتہ ہے نہ داخلے کا، ہاشم ڈوگر جیسا نکما وزیر داخلہ ہم نے نہیں دیکھا، آپ کا دامن صاف ہے تو فرح گوگی کو پاکستان کیوں نہیں بلاتے۔
انہوں نے کہا کہ ہاشم ڈوگر نے مجھے تو کافی نہیں پلائی لیکن میں انہیں دعوت دیتا ہوں، ہاشم ڈوگر پھینٹی ہوئی کافی پینا چاہیں گے تو وہ بھی مل جائے گی۔
