راولپنڈی(صباح نیوز)راولپنڈی میں چکری کے قریب کائونٹرٹیررازم ڈیپارٹمنٹ (سی ٹی ڈی) کی کارروائی میں 3 دہشتگرد ہلاک اور 2 فرار ہوگئے۔تفصیلات کے مطابق راولپنڈی میں چکری قریب سی ٹی ڈی اور دہشت گردوں کے درمیان مقابلہ ہوا،
اس دوران دونوں اطراف سے فائرنگ کا تبادلہ ہوا، جس کے نتیجے میں 3 دہشت گرد مارے گئے جب کہ 2 دہشت گرد فرار ہونے میں کامیاب ہوگئے۔ترجمان سی ٹی ڈی کے مطابق سی ٹی ڈی نے دہشت گردوں کی گرفتاری کے لئے انٹیلی جنس بیسڈ کارروائی کی، دہشت گردوں سے خودکش جیکٹ، سیفٹی فیوز وائر، رائفلیں، ائی ای ڈی بم، گولیاں اور بارودی مواد برآمد کرلیا گیا۔
ترجمان نے کہا کہ فرار ہونے والے دہشت گردوں کی گرفتاری کے لئے سرچ آپریشن جاری ہے اور ہلاک دہشت گردوں کی شناخت کا عمل بھی جاری ہے۔ترجمان سی ٹی ڈی نے کہا کہ دہشت گرد راولپنڈی پر بڑے حملے کی منصوبہ بندی مکمل کرچکے تھے۔
