اسلام آباد(صباح نیوز) سینیٹ میں پاکستان مسلم لیگ(ن)کے پارلیمانی لیڈر اور خارجہ امور کمیٹی کے سربراہ سینیٹر عرفان صدیقی نے سوشل میڈیا فورم ‘ایکس’ پر جاری اپنے بیان میں کہا ہے کہ پی ٹی آئی کی طرف سے اسرائیلی ظلم و ستم کے شکار فلسطینی بزرگوں ماں، بہنوں، بیٹیوں اور بچوں کے ساتھ اظہار یکجہتی کے لیے قومی آل پارٹیز کانفرنس میں شرکت سے انکار نے پی ٹی آئی کے چہرے ہی نہیں روح سے بھی نقاب الٹ دی ہے۔
انہوں نے کہاکہ ساری دنیا میں اپنے خیالی حقوق کی پامالی کا جھوٹا پرا پیگنڈا کرنے والوں کو غزہ کی خون میں نہائی گلیاں اور بھوک سے دم توڑتے معصوم بچے دکھائی نہیں دیتے۔ پی ٹی آئی قوم کو اتنا تو بتا دے کہ وہ کس کی ناراضگی کے خوف سے اور کس کی خوشنودی حاصل کرنے کے لیے فلسطینیوں کے حق میں آواز اٹھانے سے ڈرتی ہے
